Ha ka sien nyngkong, pynkup burom ia ki samla ba pass IGNOU ha Ri Bhoi

Nongpoh, 07 Nailur:
Shi bynta ban pynshlur ia ki samla kiba la pyndep ia ka jingpule na ka Indira Gandhi Open University (IGNOU) lyngba ka Centre kaba don ha Morningstar Secondary School, Nongpoh, hynnin ka sngi ki bor pyniaid jong katei ka Centre, ha ka sien kaba nyngkong eh ki la pynlong da ka jingpynkup burom ia ki samla kiba la pass na ka IGNOU, kata naduh ia kiba pass ia ka Matrik, BA bad MA.
Ha katei ka jingpynkup burom ia ki samla pule ha katei ka Centre, ka Kong Rona Khymdeit, MDC ka Nongpoh Constituency, ka la long kum ka kongsan, ha ryngkat ka jingdonlang u Bah C. Nongrum, Principal ka Morningstar Secondary School, ki nonghikai bad ki samla kiba dang pyndep mynta ia ki kyndan bapher bapher lyngba ka IGNOU ha katei ka Centre.
Ha katei ka sngi, ki bor pyniaid ia katei ka Centre ki la pynkup burom ia 7 ngut ki samla ba pass Matrik, 5 ngut kiba pass class XII, 12 ngut kiba pass BA bad 7 ngut kiba pass MA, kine kiba shah pynkup burom ki dei tang kito kiba la wan shim bynta, hynrei ki don ruh kiba la pass bad khlem wan shim bynta ha kane ka jingpynkup burom bad kynthup ruh ki samla ba pass ha ka Computer.
Ka Kong Rona Khymdeit, haba kren kum ka kongsan ha kane ka sngi, ha kaba nyngkong eh ka la pynpaw ia ka jingsngewkmen halor ka jingdon jong kaba kum kane ka Centre ha ka Constituency, namar lyngba jong kne ka Centre kan long ruh ka kabu na ka bynta jong kito kiba don jingthrang shisha ban pyndep ia ki jingpule lyngba ka IGNOU.
Kumta na ka liang jongnga kum ka nongmihkhmat paidbah, nga kyntu ia ki bor pyniaid jong kane ka Centre ba phin dang pynbit pynbiang shuh shuh ia kane ka jaka pule, namar dei lyngba jong kiba kum kine ki jaka pule, kiba plie lad plie lynti ia kito ki khun samla kiba la kutlad ban pule ha kiwei pat ki jaka pule kum ha ki Kolej sorkar ne kolej shimet, bynrap ka Kong Rona.
Ka jingpass na ka IGNOU, la ka long ha kano kano ka kyrdan la pdiang ha kylleng ka ri India, hynrei ka shong pat sa ha ki samla pule ba kin pyndonkam hok ia ka jingpule jong ki, ka jingdon jong ka IGNOU ha kane ka thain, ka la long shisha kum kawei na ka lad bah ia ki samla ba la kutlad ba kin lah ban pyndep ia la ki jongpule ka jong ki, pynkut ka Kong Rona.