Shah kem ar ngut ki nonglute trok & kurup ia ka tukri

Jowai, 6 Nailur:
Ki pulit ka special team ka WJH ha ryngkat ka jingiatreilang ki pulit Ummulong, mynta ka step phyrngap ki la iohkem ia ki ar ngut ki briew kiba donkti ban lute ia uwei u trok driver ha Petrol Pump, Mukhla Umsuwe.
Kitei ki ar ngut ki dei kiba la tip kyrteng kum u Mechanki Pala na Ummulong bad u Firstman Suting na Wahiajer.
Katkum ka khubor na ki pulit, kitei ki ar ngut ki la lute haduh 40 hajar tyngka, ar tylli ki mobile phone ba shongdor T.1100/- bad T1300/- ha ryngkat ki kot ki sla kiba donkam napoh kawei ka trok NL-02N-0295 kaba niah da u Babu Ram na Jammu & Kashmir.
La iathuh ba dei ha ka 13 tarik une u bnai ba ladep ba utei u Babu Ram ha ryngkat u nongbud jong u, u Amrik Singh ki la pynieing ia katei trok jong ki ha jan Petrol pump ha Mukha Umsuwe bad ha ka por 12:30 am eiei lai ngut ki briew kila wan ban prong jubor bad shah ia u driver da ki tiar pynmynsaw bad ruh da ka wait kukri. U driver katei ka trok u la mynsaw bad u la hap ban shah sumar ha Woodland Hospital Shillong.
Ki pulit hadien baki la iohkem ia kitei ki ar ngut, ki la phla ba ki la leh ia katei ka kam bad ki la ialam lynti ruh ia ki pulit ban kurup ia katei ka wait kukri. Uwei pat u paralok jong ki u dang jahrngai bad ki pulit ki dang thwet ban iohkem ia u.