Dawa synshar Administrator ka Congress ha GHADC

Shillong, 6 Nailur:
Ka kynhun ba ialam da ka seng Congress ha Garo Hills Autonomous District Council (GHADC) kaba la tip kum ka Garo Hills United Alliance (GHUA) ka la shim kabu bad ñion ia ka seng NPP kaba ialam ia ka kynhun synshar da kaba ia snohkti lang bad ki nongtrei jong ka GHADC kiba dang ia khih mynta namar ka jingduh tulop kaba 10 bnai. Katei ka kynhun ka la pynrem ia ka seng NPP, kaba ialam ia ka kynhun synshar.
U nongaiktien jong katei ka kynhun u Rupert M Sangma , MDC na Tura konstitwensi u la ong ba ka GHUA ka kyrshan tylli ia ki nongtrei ka GHADC, kiba ia khih mynta na bynta ka hok jong ki. Ula ong ruh ba katei ka kynhun kan kyntur sha ka sorkar jylla bad kumjuh ruh sha u Lat ba un tuklar ia ka jingleh katei ka EC ka bym shym la siew tulop la 10 bnai mynta ia ki nongtrei.
“Ka dei ka jingpynkheiñ ia ka hok longbriew manbriew, ngi kyntu ia ka sorkar bad u Lat ba kin shim ka lad ka lynti ban pynkut ia katei ka jingleh bym hok da kaba wanrah da ka synshar Administrator ha ka Council” ong u Rupert. Katei ka kynhun ka la dawa ruh ba u CEM ka GHADC u Denang T.Sangma u dei ban hiar shuki noh naba um lah ban pynioh ia ka hok jong ki nongtrei.
Ki la kynnoh ruh ba katei ka EC ba ialam da ka NPP kim lah ban ai jingkheiñ mynta la saw bnai tam ia ki jinglut jingsep jong ka Council , “Kam don shuh ka jingtreikam kaba shai hapoh ka council,ngi shu sahdum sah lyngngoh kaei ka ripod jong ka jinglut jingsep ne ka jingmih, ngi pynrem jur ia katei ka jingleh jong ki” pynkut u Rupert.