Ki jing burom ka sorkar ia u Tirot Sing kam pat iahap: Dr Sylvanus

Shillong, 11 Naitung:
U Tirot Sing Syiem u dei u khlawait jong ka jaid
bynriew Khasi hynrei ki kam ba ka sorkar ka leh ia une u riewkhraw kam
pat ler eiei.
U Dr Sylvanus Lamare uwei na ki nongthoh khasi uba u dei ruh u
Principal jong ka St Edmunds College, u la ong ba tang ka jingrakhe ia
ka sngi jingiap jong u Tirot Sing kam pat biang ia ka sorkar jylla ban
burom ia une u riew khraw.
“Ka jingburom ka sorkar jylla ia u Tirot Sing tang da kaba ai shuti
kam pat biang”, la ong u Dr Sylnanus.
U Dr Sylvanus uwei na ki nongthoh kot Khasi u la ong ba ka
jingpyndonburom ia une u khla wait ka donkam ban long kaba kham
shongkhia bad kaba donkam burom.
Lada u mot dur jong u Netaji u ieng hapoh ka phyllaw jong State
Central balei ka sorkar kam lah ban pynieng lem ia u dur mot jong u
Tirot Sing.
Na ka liang u Dr Lamare u la iathuh ba kham mynshwa u la ai jingmut
ia ka sorkar ban shna noh ia u mot u Tirot Sing ha jan Nan Polok hyrei
ka sorkar kam shem la pdiang ia ka jingong jong u namar haduh mynta ym
shem la lah ban iohi ia u mot ban sah jingkymmaw jong utei u
riewkhraw.
Katkum ka jingsngew jong u Dr Lamare ki kam ba ka sorkar kala leh na
ka bynta une u riewkhraw kam pat biang satia.
“Peit nuksa tang ia ka Assam ka jylla kaba iajan bad ngi ia ki
riewshlur ki ju tei da u mot dur bad ki da pynitynnad bha ia ki jaka
khnang ba kan long ka jingsah jingkynmaw ia ki”, la ong u Principal ka
St Edmunds.
Ha kajuh ka por, u la pynpaw ia ka jingbynniaw ia ka jinglong ka
jaitbynriew namar ba ha kane ka juk mynta ym don Tirot Sing shuh kum
mynshwa.
Lah ban pynkynmaw ba ka sorkar ka la ju rakhe ha ka 17 tarik Naitung
man u snem ia ka sngi iap jong u Tirot Sing.
Haduh mynta dei tang ki sengbhalang kum ka KSU kaba pynieng ia u dur
jong u Tirot Sing. Hynrei kiwei ki shu tei nam da u mot khlem ka dur.