“Ngan dang ia khun beit ha u 2018 ruh” ong u bah Rowell

Shillong, 1 Nailur:
Naduh ka elekshon ha u snem 2013, ki khubor ki la saphriang ba u bah Rowell Lyngdoh MLA ka seng Congress na Mawkyrwat u don jingmut ban shongthait noh hynrei ki paidbah nongkyrshan jong u kim shym la ailad ia u bad ki la pynbor ba u dei ban ia khun hi beit. Ka jingaidak u bah Rowell ban shongthait noh ha u 2013 ka la pynthikna ia kiba bun ki nongkyrshan jong u ba ha u snem 2018 un shongthait noh naba ka rta jong u ruh ka la noh.
Hynrei ka jingshah pynhiar shuki jong u, na ka kam symbud myntri rangbah ha u myntri rangbah ka jylla ka la pyning ia ka mynsiem utei u nongialam radbah ka Congress ha kaba mynta u la pynbna sha la ki paidbah nongkyrshan ba watla u la shah pynhiar shuki ruh hynrei kim dei pat ban duh jingkyrmen naba ha ka elekshon 2018 ruh un dang ia khun hi bad katei ka jingong jong u la sngewthuh ba lada un jop biang ha u 2018 kan dei ka jingiapyni bor kaba heh hapoh katei ka seng.
Ha ka sngi hat majai ki nongkyrshan jong u bah Rowell ki la pynlong jingialang ha Mawkyrwat bad ha katei ka jingialang nalor ki jingsngewsih ba ki la pynpaw halor ka jingshah pynhiar shuki jong u bad nalor ka jingkmen pat ba watla u bah Rowell u la shah pynhiar pynban ki dang ioh myntri sorkar napoh katei ka District. Haba ia kren bad u Rupang u General Secretary ka Mawkyrwat Block Congress Committee u bah Remdor u la ong ba u bah Rowell u la phah ktien ruh ban pynbna sha ki paidbah nongkyrshan jong u ba kim dei ban duh jingkyrmen, “U Ma deng Rowell u la ong ‘wat duh jingkyrmen , ngan ym shongthait , ngan ia khun beit ha u 2018 ruh’” ong u bah Remdor.
U bah Remdor u la ong ba dang ha ka 24 tarik mynta u bnai u Dr.Mukul Sangma myntri rangbah ka jylla u la kyntait ba ka don jingthmu ban pynhap shuki ia u bah Rowell,hynrei tang hapoh ka 24 kynta kata ha ka 25 tarik la phah ia u da ka bor ba u dei ban risaiñ beit bad u la ong ba u bah Rowell u la pan map na ki nongkyrshan jong u ba um shym la ioh ban kynjoh ktien naba la phah da ka bor ba un leh beit wut wut .
Haba kylli pat kaei ka jingpher hapdeng u M.M Dango bad u bah Rowell kum ki myntri sorkar utei u nongialam ka MBCC u la ong ba ym lah ban ong eiei namarba ki don la ka jong ka sap treikam bad la ka jong ka bynta hynrei ki dei pat kiba trei shitom na bynta ka district bad ki la dei ruh kiba la trei radbah ban pynioh District ia ka Mawkyrwat.