Nga la iakren bad u CEM ka KHADC: Dr Mukul

Shillong, 31 Nailar:
U Myntri Rangbah ka jylla u Dr Mukul Sangma u la ong ba ka KHADC ka dei ban pynphai biang (recall) noh ia ka Village Administration Bill (VAB) khnang ban pynsted ia ka jingpyntreikam ia ka.
Hynrei kaba sngew phylla, ka long ba u Myntri Rangbah uba la ju iakwang ktieh mar kylliang bad u CEM ka KHADC u Bah Pyn-shngain N Syiem, u la kam ba u la dep iakren bad u CEM ka KHADC halor kane ka kam.
Kane ka jingkren jong u Myntri Rangbah ka long hadien ba la wai ka jingialang bad ka Synjuk ki Nongsynshar Shnong ka Bri u Hynniewtrep (SNSBH) hynne ka sngi. U Myntri Rangbah u la ong ba ka KHADC ka dei ban pynphai biang ia kane ka Bill (VAB), bad rah biang ha iing dorbar ban pynkylla (amend) khnang ban lait na ka jingiatyngkhuh bad ki kyndon ka riti synshar ka ri kumba la pan jingshai ka tnad Kam Pohiing ka ri kiba don haduh 12 tylli ki mat.
“Ban sted ka jingmynjur u Lat ia ka VAB, kaba iatyngkhuh bad ka tnad Kam pohiing ka ri, ka KHADC ka dei ban pynphai noh ia ka VAB bad wanrah da ki jingpynkylla (amendment) halor jongka”, la ong u Myntri Rangbah.
Kane ka jingkren jong u Myntri Rangbah ka long ba ka KHADC ka dei ban weng noh ia ki kyndon kiba ka tnad Kam pohiing ka ri ka la pan jingshai khnang ba ka VAB kan iaid beit sha ophis u Lat ka jylla ban ioh ia ka jingmynjur kloi ia ka.
U la ong ba ka tnad kam pohiing ka ri ka la pan jingshai haduh 12 tylli ki mat halor ka VAB namar ba ki don ka jingiatyngkhuh bad ka riti synshar ka ri. Ia ki jubab halor ka jingpan jingshai ka tnad Kam pohiing, la phah da ka KHADC sha ka sorkar bad ka sorkar jylla kan dang eksamin bha ia ki shwa ba kan phah sha ka tnad kam pohiing.
“Ka KHADC ka la phah ia ka jubab halor ka jingpynshai ia ki 12 tylli ki mat sha ka sorkar jylla bad ngin sa eksamin bha ia ki”, la ong u Dr Mukul Sangma.
Hynrei na ka liang u Myntri Rangbah u la ong ba ka long kaba donkam ba ka KHADC kan shim khia kyrkieh ban wanrah beit da ki jingpynkylla ia ka VAB namar ba ka tnad Kam pohiing ka lah ban nym hun ia ka jingpynshai jongka bad lada ka long ha kane ka dur, ka jingmynjur ia ka VAB kan nang slem shuh.
U Dr Mukul ula bynrap ba ki Rangbah shnong ki dei ban iarap lang ia ka KHADC halor kane ka bynta.
Ha kawei ka liang, u Myntri Rangbah u la iathuh ruh ba ka sorkar ka la rai ban pyrkhat biang ia ka rai jongka ban pan kyrteng ia ki nongtrei sorkar kiba bat kam Shnong bat kam ha ki kynhun. “Ngin sa bishar biang ia kane ka kam hadien ba ka kynhun jong ki Rangbah Shnong ka la kyrpad ia ka sorkar”, u la ong.
Halor ka jingdawa ka SNSBH ban pynlait noh ia ka MUDA ha ki jaka ba hap ha ka jingpeit jong ka Autonumous District Council (ADC), u Dr Mukul u la ong ba ka sorkar kan sa bishar bniah ha kaba kan sa thaw ruh ia ka met ban peit ia ki jaka ba hap shabar ka Municipal bad ruh ia ki jaka ba hap hapoh ka jingpeit jong ka ADC. “Ngin sa khot lang ia ki ADC, ki Rangbah shnong bad kiwei ban iakren halor kane ka kam”, la ong u Dr Mukul Sangma.