Lap ia ka Camera jong ka mem, ba ngam jyllop ha Wah Umngi

Shillong, 31 Nailar:
La ioh tam ha ki khyndiat sngi ba ladep, ia ka camera jong ka mem, kaba la ngam jyllop ha wah Umngi, ha Phlang-wanbroi bad la ioh tam ia katei ka Camera Hero 3+, da U bah Bremingstar Snaitang na Weipung jong ka Wah Umngi hi, kaba jngai kumba 25 Kilometre, na ka jaka ba ngam jyllop ka mem. U bah Breming, u ioh ia katei ka Camera, ha ka 6tarik Nailar 2016, ha katei ka jaka kaba don hapdeng ka shnong Nongkynbah bad Domshken. U Bah Breming, u ioh tam ia katei ka Camera na rud jong katei ka Wah, kaba don ki dohkha, kiba heh bad kiba khia haduh 50 kilo eiei, ong U bah GG Bung Snaitang, uba dei ruh u hynmen ar kmie jong U bah Bremingstar. U bah Bung, u iathuh ruh ba kin leit ban aiti noh ia katei ka Camera ha ka DC Mawkyrwat ha ka taiew ka ban wan, ha kaba ki don kumba 216 tylli ki dur ba la shon da ka mem Beth Hume, ha kylleng ka Ri Khasi.
Lah ban pynkynmaw, ba katei ka mem, ka la ngam jyllop, katba ka dang jngi ha Wah Umngi, ha ka 5tarik Naiwieng 2015, kaba don hajan ka shnong Phlangwanbroi, jong ka South West Khasi Hills District.