Hiar ïar ka jingwan rung ki nongpang ha Robert Hospital

Shillong, 30 Nailar:
La kumba hiar kynsan ka ioh ka kot khamtam ha ri Lum Jaintia namar ka jingshah khang dewiong, ka la hiar ruh ka kamai kito ki nongshong dukan kiba ju shongdie jingdie ha syndah ka Robert Hospital, Shillong. Ka jingpoi duna ki nongpang hapoh katei ka Hospital khamtam ha une u snem, mynta ka la ktah jur ia ki dukan sha dukan ja, ki dukan die jingbam bad kiwei pat ki nongdie jingdie ha kaba ki la iathuh ba ka iew ka hat jong ki kam ler shuh mynta, namar ka jingduna palat ki briew ym kumba ju long ha ki por mynshuwa.
U nongthohkhubor u la leit peit ia ka jingrung jingmih ki briew hapoh katei ka hospital ha ka por ba la pyllait ban peit nongpang bad la iohi ba ka la pher shibun bad ka la i dait thah jar jar, ym kumba ju long mynshuwa. U nongthohkhubor u la kylli na ki briew kiba ju don ha katei ka jaka, naduh mynno ka la jia katei ka jingkynjah briew hapoh Robert Hospital, ki la iathuh ba dang khyndiat por mynta hadien ba la mih ki kynrum kynram hapdeng ki nongtrei katei ka Hospital bad ki bor pyniaid.
Nalor ki nongshong dukan ka la ktah ruh sa ia ka kamai ki nongniah Taxi, kiba ju ieng baroh shikatta hakhmat katei ka hospital ban ap nongleit nongwan bad ban ap ban leit buh ia kiba dang mih na hospital, la iohi ba ha katei ka jaka ba ieng ki Taxi ruh ym don Taxi shuh mynta kiba ieng lain bad ki la iathuh ba kam myntoi shuh ban ieng pynjynjar ialade naba ym don briew shuh.
Katkum ka jingiathuh ki briew kiba ju im kamai da kaba shong die jingdie ha syndah ka Robert Hospital, ki la ong ba mynshuwa ha ka shisngi la iohi ba ki kali nongpang ki rung wut wut hapoh katei ka hospital ban wan buh nongpang hynrei mynta tyngkhat wei ar ngut kiba rung.
Lah ban kdew ba khyndiat bnai mynshuwa ka la mih ka jingbym ia sngewthuh jingmut hapdeng ki nongtrei ka Robert Hospital bad ki bor pyniaid jong ka ha kaba ki nongtrei ki la mih paidbah ban ia khih bad ban pyrshah ia ki bor pyniaid da ka jingkynnoh ba kam biang ka rukom pyniaid jong ki.
Lah ruh ban kdew ba mynshuwa katei ka Hospital ba la pyniaid da ka KJP bad kaba la wanrah da ki Mishoneri ka dei ka Hospital kaba khring bha khamtam ia ki paidbah na nongkyndong hynrei ka jingmih ka huri hura hapoh katei ka hospital mynta ka la pyntieng pynsmiej ia ki nongpang ban rung hangtei.