Ia ngi kiba aiti ia ka party u pynngam, ia kiba pynjot, u pynkiew: Rowel

Shillong, 30 Nailar:
Ka jingpynhiar shu-ki jong u Myntri Rangbah u Dr Mukul Sangma, ka la pynbuh ingtyrkhong ia u Symbud Myntri Rangbah barim u Bah Rowel Lyng-doh, uba la pynlait syndon tlam pyrshah ia ka jingleh jong u Dr Mukul Sangma.
“Nga la phah ia ka shithi sha ka AICC hynnin ka sngi Nyngkong, ngan sa leit ai sa ha u Bah DD Lapang u President ka MPCC ba un tip ia ka jingujor pyrshah jong nga ia u Myntri Rangbah u Dr Mukul Sangma sha ka AICC”, la ong u Bah Rowel Lyngdoh haba iakren bad u nongthoh khubor hynne ka sngi.
“Kaba sngewsih ka long ba u pynkiew (ai shuki myntri sorkar) ia ki briew kiba pynjot ia ka party katba ia kiba aiti lut ia ka party u ai da ka bainong mar khongpong”, la ong u Bah Rowel.
“U don tang uwei (Mukul Sangma) uba la pynjot ia ka party Congress ha kane ka jylla”, la bynrap u Bah Rowel.
U Bah Rowel u la ong ba ha ka shithi ha ka AICC u la pynkynmaw ba ha ki bnai ba la dep, la don ki MLA ka Congress na kane ka jylla kiba la ujor pyrshah ia u Dr Mukul Sangma namar ba u la pynngam ia ka party ha kane ka jylla, kaba u Bah Rowel um don bynta satia ha kane ka kam.
“Ha kine ki bnai ki don ki MLA ba wan mih sha phi kiba dawa hiar shuki ia u Myntri Rangbah, ba u la pynngam ia ka party, nga kwah ban tip halor kane”,la ong u Bah Rowel katkum ka shithi ba u la thoh sha ka AICC.
U la pynpaw ia ka jingsngew kyndit ia ka jingphah risain jong u Myntri Rangbah namar ba u kam ba la ai bor ka AICC tangba, um pat sngew lah ngeit ia kane ka jingkam jongu ba la ai bor ka AICC.
“Nga dang sngew artatien ba un ioh bor na ka AICC”, la bynrap u Bah Rowel.
U la ong ba ki paidbah ka jylla ki dei ban bishar bha ia ki kam ba la leh da u Dr Mukul Sangma namar ba dei tang ma u marwei uba pynjot ia ka party.
Lah ban kdew ba u Bah Rowel bad u Bah AL Hek ki la shah pynhap shuki noh bad ha jaka jongki, la thep da u Martin M Danggo bad u Bah Ronnie V Lyngdoh.
Katkum ka jingkam jong u Bah Rowel, ka jingleh jong u Myntri Rangbah ban pynhap shuki ia u kynsan kynsan, ka long kaba eh ban pdiang watla kum u briew ba don ha ka party u hap ban kohnguh.