Ngim phet seng, ngin ia khun beit hapoh ka seng, ong u bah Diverland

Shillong, 30 Nailar:
U Vice President ka seng Block Congress na Mawkyrwat u bah Diver-land Lyngdoh u la pyn-paw ka jingbitar namar ka jingshah pynhap shuki u bah Rowell Lyngdoh ha u myntri rangbah ka jylla u Dr.Mukul Sangma. Haba ia kren bad u Rupang u bah Diverland u la ong ba jingleh u Dr.Mukul ka la ithamula ha kaba u nud ban pynhap shuki kat ia u dkhot ba la rangbah duh ka seng Congress, khlem da kynjoh ktien bad khlem kano kano ka daw.
“Ka I thamula bad ka long kaba lyngngoh ba kat u nongialam ba la rangbah ka seng uba la pynkhie im ia ka seng naduh u snem 1983 , ym shym la kheiñ snep satia hynrei la shu pynhap shuki noh khlem da kynjoh ktien na ki para nongialam” ong u ba Diverland. Haba la kylli kaei ka sur ki paidbah nongkyrshan ka seng Congress na Mawkyrwat hadien ka jingshah pynhap shuki u bah Rowell, u bah Diverland u la ong ba baroh ki ang lyngngoh hynrei u la ong ba kin ym shongthait ban ia khun namar katei ka jingjia.
Haba la kylli hato ka lah ban poi sha pud uba kin phet seng noh u bah Diverland u la ong “Ngin ym phet seng satia,hynrei ngin ia khun beit hapoh ka seng”. Katkum ka jingong utei u rangbah la sngewthuh ba kan don ka jingiakyrjiaw kaba jur bha nangne shakhmat hapdengu ba Rowell bad u Dr.Mukul Sangma ha kaba katei ka kam ka la sdang mynta ban poi sha ki heh ka AICC.
Halor katei ka jingjia ki paidbah nongkyrshan jong u bah Rowell Lyngdoh ki la pynlong jingialang mynta ka sngi ha Mawkyrwat ban pyrkhat ia katei ka kam, ha kaba baroh ki la pynpaw ka jingsngewsih kaba jur bad ki la shim ba katei ka dei ka jingleh lyndet ia u MLA jong ki uba dei ruh u nongialam ba radbah katei ka seng ha ka jylla.