2 hajar tynrai ki siej, ban thung ha Nongstoin Block

Nongstoin, 30 Nailar:
Ban pynsngewthuh ia ki paidbah halor ka jingdonkam ban sumar ia ka mei mariang bad ban kyntiew ia ka ioh ka kot lyngba ka jingthung ia ki jait jingthung kiba ai jingmyntoi, ka sorkar Jylla, lyngba ka tnad Horticulture, ka la bhah haduh palat 2 hajar tynrai ki jait siej ba kyrpang na ka bynta ka Nongstoin C&RD Block ban thung ha ki shnong bapher bapher kiba don ha katei ka Block.
Ia kitei ki jait siej kiba kyrpang la tip ruh kum ki ‘Hybrid Bamboo’, ia kaba la wanrah ruh ia ki na shabar jong ka Jylla, bad ban pynsaphriang ia katei ka rukom thung ia kitei ki siej ha ki shnong ki thaw la ia snohkti lang da ka ophis jong u BDO ka Nongstoin C&RD Block bad kiwei kiwei ki tnad sorkar bapher bapher.
Kitei ki jait siej ki long ruh kiba kham pher na ki siej kiba don ha ri lum Khasi bad ki lah ban man bha ruh ha ki katto katne ki jaka kiba syaid ka suin bneng, bad lada lah ban pynneh ruh ia ka rukom thung ia kitei ki jait siej, ka lah ban ai jingmyntoi shibun ia ki paidbah ha kiba bun ki liang.
Hapoh Nongstoin Block ia kitei ki jait siej la wanrah kumba ar hajar tynrai ei ei bad la sam ruh ia ki sha ka shnong Mawdet jong ka thain Rambrai bad Risiang, ha kaba yn dang bteng ruh ia katei ka jingsam sha kiwei pat ki shnong kiba hap hapoh katei ka Block.
Ha kaba iadei bad katei ka bynta na ka liang jong u bah V. Swer BDO ka Nongstoin C&RD Block, haba ai jingpynshai sha ki paidbah nongshong shnong ka thain Risiang hynne ka sngi, u la ong ba kitei ki siej kidei ki jait siej kiba rben bad kiba iaid iew bha na ka bynta ban pyndonkam ha kaba shna kot sada bad kiwei kiwei.
“Nalor ki kam pynroi kiba bun ba ki paidbah kila ioh na ka sorkar lyngba ka jingpyntrei ia ki skhim MGNREGS, mynta ka kynti pat ka sorkar kala wanrah sa ia kine ki jait siej ba ym tang ba ki long kyrpang hynrei kin ai jingmyntoi ruh ia ngi lada ngi lah ban sumar bha” ong u bah Swer.
Ha katei ka sngi nalor u BDO la iadon lang ruh u bah S.Rashir MDC barim u ba dei ruh ha kajuh kapor kum u sordar ka shnong New Nongstoin, u la kyntu ia ki paidbah ka thain Risiang ba ki dei ban sumar bad tyngkai bha ia kaei kaba ka sorkar ka la ai na ka bynta ka jingmyntoi jong ki.