Yn ujor u MDC, ia ka Dhar kompani

Shillong, 30 Nailar:
U bah James Syl-liang, MDC ka Mawhati un leit ban ujor lashai ka sngi ka 31 tarik u nailar pyrshah ia ka Dhar kompani namar ka jingtrei torti ia ka jingkieng dewbilat kaba don hajan ka shnong Pamlatar bad Umtyrkhang –Ri-Bhoi District kaba la khyllem noh ha kine ki khyndiat sngi. U MDC ka Mawhati un leit ban ujor sha u Deputy Commissioner ka Ri-Bhoi District u C.P Gotmare.
U bah Sylliang u la ong ba un ujor sha u DC ba u dei ban pynshitom katkum ka aiñ ia ka Dhar Kompeni bad ba ka dei ruh ban siew bailut ksan sha baroh ki nongtrei bylla kiba mynsaw. U la ong ruh ba un thoh sha u Executive Engineer ka PWD Umsning. Lah ban pynkynmaw ba ha ka 25 tarik mynta u bnai ka jingkieng dewbilat kaba la shna da ka M/s Dhar Construction ka la khyllem bad ha katei ka jingjia ki nongtrei katei ka kompeni kynthup u enjiniar kila mynsaw.