Nga long kum u MLA 108, ong u Bah Titos

Shillong, 11 Naitung:
U MLA ka Sohra u Bah Titossstar Well Chyne u la
ong ba u long kum u MLA kum ka kali 108 (EMRI) kaba tang shu phun la
poi beit khlem da don kam iakynduh.
“Kumba ong ki paidbah nga long kum kum u MLA 108 namar tang shu phun
la poi beit”, la ong u Bah Titos.
Ia kane u Bah Titos u la kren ha ka jingialang haka sngi ba u pynkup
burom ia ki khynnah kiba pas bha ha ka exam matrik 2013 na ka skul
Village Dorbar Upper & Secondary School ha ka shnong Swer Sohra.
Ha katei ka jingialang pynkup burom u Bah Titos u la iaroh ruh ba
kane ka skul ka la paw bha ha ka liang ka pule puthi bad u la ong ba
wat ki khynnah kiba kham jngai kum na ka thain Laitryngew, Sohrarim
bad na ka thain Khatarshnong ki iapoi ban wan pule ha kane ka skul.
“Mynshwa ha ka por jong ngi pas tang ha ka Third division la ia khawai
ha iing hynrei ha ka juk mynta la eh bha ban poi ha First Division”,
la ong u MLA ka Sohra.
U la ong ruh ba ki kmie ki kpa kim dei ban ai lad ba ka jingduk kan
khang lad khang lynti ia ki khun ba kin pule bad kumjuh ia ki khynnah
ba kim dei ban niewbein ia la ki jong ki kmie ki kpa wat lada ki kham
nang ha ka jingnang jingstad hynrei ki dei ban burom ia ki ba kham
halor ia ki.
Ia kine ki khynnah baroh khoit la pynkup burom da ka Managing
Committee jong katei ka skul ha ka baroh ki khynnah ki ialeh ia ka
exam ki don 26 ngut, 8 ngut ki poi ha kakyrdan kaba nyngkong, 1 ha ka
kyrdan balai bad 17 ngut ha ka kyrdan ba ar.