Rahbor u Draibar Taxi 2 ngut ki khynnah skul

Shillong,29 Nailar:
Ha ka 25 tarik mynta u bnai ar ngut ki khynnah skul kiba dang don ha ka rta 15 snem eiei, ki la shah rahbor ha uwei u rangbah uba ki ithuh ithaw bha. Katei ka jingjia ka la jia ha ka por ba la wai skul, ha kaba kitei ki khynnah ki lathmu ban leit noh sha ing, hynrei ha katei ka por ki la iohi ia ka kali utei u draibar uba ki ithuh bah uba ki ju khot ieid u Paduh bad hangta ki la kiew noh da ka kali jong u. Utei u nongniah Taxi u dei uba niah ia ka kali kaba don ia u nombar ML-05 J4098.
Phewse u Paduh u la rahbor bad pyndih bu-aid ia ki,u la rahbor ia ki sha Kharsati Park ha ryngkat ka jain phong skul jong ki bad hangta u la pyndih bu-aid ia ki haduh ba kim tip briew shuh. Hangtei u laleh be-i-jot ia ki baroh shimiet bad ha ka step kaba bud u la leit bret ha kawei ka khlaw kaba don hajan NEHU.
Utei u Paduh u dei uba la tip kyrteng kum u Ronald Wahlang uba shong basah wai ha Mawlai Nongkwar. Ia ka skul ba kitei ki khynnah ki pule lem bad ka kyrteng la buhrieh noh. Hadien ba ki kmie ki kpa ki lap ba ki khun jong ki kim wan phai ing ha ka sngi kaba bud ki la leit tan ia utei u Paduh bad ki la kylli na u, naba ki la don kiba iohi ba kitei ki khynnah ki kiew ha ka kali jong u ha ka sngi 25 tarik.
Ha katei ka por la iathuh ba u tei u Paduh u la ong ba un sa leit wad ma u ryngkat bad ka lok jong u hynrei ki kmie ki kpa jong kitei ki khynnah kim ailad bad ki la ong ba kin ia leit lang beit, kham hadien u la ialam ia ki sha ka jaka ba u la bret ia kitei ki khynnah bad la lap ba ki la shoh tlot bad ki la phla ia ka jingjia ba la jia baroh shimiet.
Hadien katei ki kmie ki kpa jong kitei ki khynnah ki la ujor ar tylli ki ejahar pyrshah ia u Ronald Wahlang ha Mawlai Police Station, hynrei la ong ba ha katei ka por kiba ha ing hasem jong u shynrang ruh ki la ia wan sha thanad bad ki la pyrshang ban ia kren ia suk noh bad ki kmie ki kpa jong kitei ki ar ngut namarba u dei uba la don khun don kti, hynrei la iathuh ba ki bahaing jong kitei ki khynnah skulkim treh ia suk bad ki kwah ba ka aiñ kan trei la ka jong ka kam.
Halor katei ka jingjia ka HANM Women Wings lyngba ka President jong ka ka kong Bity Jyrwa ryngkat bad ka Publicity Secretary ka kong A.Rapsang ki la dawa na ki pulit ba ki dei ban pynshitom ia u katkum ka aiñ.