2 Nailur, yn tur sa ki draibar Taksi sha Secretariat

Shillong, 29 Nailar:
Ha ka 2 tarik mynta u Nailur, ka East Khasi Hills Local Taxi Welfare Association kan pynlong ia ka jingiaid paidbah naduh Khyndailad na ophis ka State Bank of India bad nangtei kan iaid ter ter, tawiar ia ka Secretariat bad kan kut ha kajuh ka jaka, ha kaba katei ka jingiaid paidbah kan sdang naduh ka por 11 baje mynstep. Ki Taxi kamai ha Shillong ki la jied ia katei ka sngi ban iaid paidbah kum ka dak ka jingiasnohkti lang bad ka All India Trade Union ( AITU) kaba la pynbna ia khih ha katei ka sngi kum ka dak ka jingpyrshah ia ka jingpynkiew dor ia ka bai Insurance.
Ha katei ka jingiaid paidbah ki Taxi kin rah ruh bad ki pla kad kiba don ki jingthoh bapher bapher ban pyrshah ia katei ka jingkiew dor ka Insurance bad kumjuh kiba ia dei bad kiwei pat ki jingeh ki Taxi, kiba ki la ju iai dawa na ka por sha ka por. Haba ia kren bad ki nongthohkhubor u General Secretary ka seng ki nongniah Taxi ha East Khasi Hills u bah Wandonbok Jyrwa u la ong ba katei ka sngi kan dei ka sngi ba baroh ki nongtrei kiba ioh ia ka jingsiew kaba rit kin ia shim bynta lang.
Katei ka jingiakhih kan dei kaba yn ialam da ka Joint Action Committee ( JAC) jong ki kali kamai ha baroh kawei ka jylla bad ha katei ka jingiakhih yn ia shim bynta ruh da kiwei pat ki kynhun kiba ioh ka jingsiew kaba rit kum ki nongtrei ASHA, ki Aganwadi,Muster Roll bad kiwei pat. Ki nongkamai Taxi, ki la pynsngew sha ki nongthohkhubor ia kiwei pat ki mat kiba ki la ju ia kren naduh mynshuwa kiba ki ia kynduh jingeh ha ka kam kamai jong ki.