Tyrwa tiket ka HSPDP ia u bah Paidang na Mawkynrew

Shillong, 29 Nailar:
Ki khubor ki la saphriang ha kylleng ha Mawkynrew Konstitwensi ba u MDC ka seng Congress u bah Banteidor Lyngdoh (Paidang) un ym ia khun na ka seng Congress ha ka elekshon MLA 2018 naba la ong ba ki paidbah katei ka konstitwensi kumba ka long mynta ki la kyrngah khlieh ia ka seng Congress.
Ki paidbah ka Mawkynrew konstitwensi ki la iathuh ba u bah Paidang ryngkat bad ki nongkyrshan ba radbah jong u, ki la shim rai ba um dei shuh ban dang ia khun na ka seng Congress ha ka elekshon MLA. Shuh shuh la ioh jingtip ba tang mar ia phriang katei ka khubor ka seng HSPDP ka la leit tyrwa sha u bah Paidang ba un ia khun noh na katei ka seng ha ka elekshon MLA 2018.
Katkum ka jingioh lum jingtip la ong ba u bah Paidang haduh mynta um pat ai ia ka rai kaba khadduh sha katei ka seng,hynrei la sngewthuh pat ba u don jingmut ban ia khun na ka PDF kaba dei ka kynhun synrop kaba synshar ha KHADC kaba la sawa jam ba kan dei ka seng saiñ pyrthei ha u 2018.
Ki tyllong khubor ki la iathuh ruh ba lada jia ba ka jingiakren ban thaw ia ka PDF kan urlong u bah Paidang un ia khun beit na ka PDF hynrei lada jia pat ba u bah Pynshngaiñ N Syiem un ym thaw ia ka PDF u bah Paidang u lah ban kynriah noh sha ka seng HSPDP.