7 tylli ki projek, pyndep ka tnat ialehkai, 13 tylli ba dang sahteng

Shillong, 29 Nailar:
Na ki 71 tylli baroh ki projek kynthup naduh ka jingshna madan, shna peitkai bad kiwei ha ka jylla, tang 7 tylli kiba la dep shna katba 13 tylli kiba dang sahteng khlem pat pyndep, katba kiwei dei bun kiba dang don ha ka jingkhot tender bad don ruh kiba la pyndep.
Katkum ka jingtip da ka ain wad jingtip na ka State Sports Council (SSC), ki kam ba la dep pyndep ki kynthup ka jingshna ding ramhah (floodlight) ha JN Stadium, Polo Shillong, ka jingshna ia ka madan phlang plastik ha madan heh Mawlai, ka jingshna madan plastik ha Ladthalaboh, Jowai, ka jingshna ia ka madan plastik ha Mawkyrwat ha ka madan Mawkyrwat District Sports Association. Nangta, ka madan Futsal ne madan kynjatbol san ngut shiliang ha Dienchynrum, Khliehriat, ka madan Futsal biang ha Shillong Public School, Laitumkhrah bad u lain mareh ne synthetic track ba la dep shna ha madan JN Stadium, Polo, Shillong.
Katkum ka jingtip, la pyni ruh ba ki don 13 tylli ki madan bym pat dep ban shna bad kine, ki kynthup ia ka Indoor Sports Hall ha Tpep Pale, Jowai, ka jaka sah ia ki nongialehkai kaba ha JN Stadium, Polo, Shillong, ka jingshna a ka Indoor Sports Hall ha Chandmari, Tura, ka jingshna ia ka Indoor Sports Hall ha Garobadha, South West Garo Hills, ka jingshna ia ka Outdoor Stadium ha Dakopgre ha Tura, ka jingshna ia ka jaka peitkai ha JN Stadium Polo, Shillong. Ka jingshna ia ka madan Pynden Mawthawniang, ka South West Khasi Hills, ka jingshna ia ka madan ha Mawkyllei ha West Khasi Hills, jingsiang ia ka madan Futsal ha Ampati ka South West Garo Hills, ka jingshna ia ka madan Futsal ha Ampati, jingshna ia ka madan Futsal ha Resubelpara, jingshna ia ka Indoor Sports Hall ha Laban jong ka Laban Sports Club bad ka jingshna ia ka Indoor Sports Hall ha Lower Lumparing, Shillong.