Pynrem ia ka ‘Dhar Kompeni’ ba twa ka jingkieng Pamlatar

Shillong, 29 Nailar:
Ka Hynñiewtrep United Awakening Movement (HUAM) North Khasi Hills Ri-Bhoi district ka la pynrem jur ia ka Dhar Kompeni’ halor ka jingtwa ka jingkieng ha Pamlatar ha wah Shang kaba hap ha Mawhati ha ki khyndiat sngi, haduh ba la mynsaw bun ki nongtrei.
Ka HUAM-North Khasi Hills ka la pynpaw ia ka jingbitar kaba khraw eh ia ka jingtrei torti jong ka Dhar Company.
Ha ka kyrwoh ba la phah da u President u Bah J Lakhiat ka la pynrem jur ia katei ka jingjia bad ai jingkyrshan ruh ia ka Bharatiya Janata Yuva Morcha (BJP Youth Wing) ka Ri-Bhoi district kaba la shimkhia ban dawa na ka tnat PWD ban pynshai hapoh ka 6 sngi halor katei ka jingtwa kynsan katei ka jingkieng.
Ka HUAM ka kyntu ia u contractor uba pyntrei ia katei ka jingkieng ba un shimkhia ba kito ki nongtrei katei ka Company kiba la mad ia ka jingmynsaw ki dei ban ioh ia ka bai buria dawai bad baroh ka bai lut bai sep jong ki.
Katkum katei ka jingjia, ka HUAM ka la ong ba katei ka jingkieng ka dei kaba dang shu shna halor ka Wah Shang ban pyniasoh na ka shnong Pamlatar sha Mawlaho ba la shna da ka dewbilat kaba hap hapoh ka Mawhati Constituency.
Bad ka HUAM ka kyntu ruh ia ka tnat PWD ba ka dei ban shimkhia nangne shakhmat ban ym ai kulmar ia kiba kum kitei ki jingtei sha kito ki kontraktor ki bym pat kot bor satia ban tei bad sha ki kompani kiba shu rhah tang ka pisa khlem pyndep janai ia ka jingtrei jong ki ha ka rukom kaba dei bad ka ban long ruh ka jingshngaiñ ia ki paidbah, namar lada kiba kum kitei ki jait kompani kin dang iohlad ban suh khlieh ha katei ka tnat ha Ri-Bhoi district, bun ki jingkieng kali bad ki jingtei kynroh surok kali kin kylla ki jaka pynmynsaw bad iap briew ia ki paidbah nongleit nongwan.
Ha kaba iadei bad katei ka jingjia, ka HUAM kan sa leit kynduh ia u Heh katei ka kompani uba long trai da u Bah Ngaitlang Dhar MLA ka Umroi constituency bad khatduh eh ka HUAM ka kyntu jur ia kiwei ki kontraktor ba kim dei ban trei torti ia ka kam ba la bynshet ha ki khnang ba kan ym wanrah ia kiba kum kitei ki jait jingjia ba sngewsih hadien habud.