Shah kem uba batbor ha Pynursla

Shillong, 28 Nailar:
Uwei u rangbah uba la don 65 snem karta na ka shnong Pynursla u la shah kem ha ki pulit hadien ba la don nongujor pyrshah ia u, namar ki kam batbor. Katkum ka jinguor laong ba utei u rangbah u la bat tnga jubor la ar snem shiteng mynta ia ka khynnah 13 snem karta kaba dei ka khun jong ka para kynsi jong u.
U la phla ia katei ka jingleh jong u ha ka kmie jong ka ha ka por ba u la bu-aid,u la byrngem ruh ba lada ka iathuh briew un leh jadu ne un pyniap ia ka. Ki kmie ki kpa katei ka khynnah ki la tieng bad bunsien ki pynrieh ia ka khun jong u hynrei la don ki paralok jong ki na Shillong kiba la kynti ba ka dei ban ujor sha ki pulit bad kan ym jia eiei ia ka. Kumta ha ka 25 tarik mynta u bnai ka la ujor pyrshah ia utei u rangbah.
Katkum katei ka jing ujor, ka sien kaba khadduh eh ba u bat tnga ia ka ka dei ha u kyllalyngkot mynta u snem katba ka kmie pat ka tip haduh u jylliew. Kiba haing hasem katei ka khynnah ki la dawa ia ki pulit ba kim dei ban pyllait jamin ia utei u briew. Ki pulit ka Pynursla ki la kem ia u hadien ba ki la rejistar case bad la pynngat ia u ha ki kyndon u/s 506 IPC R/w Sec 9 (I)(m)(n)/10 POCSO Act.