Poi hospital u kpa, ka kmie bad ki khun, naba bam Chow

Shillong, 10 Naitung:
Saw ngut ki briew ki la poi hospital ha Nazareth hadien ba la suba ba ki la bam ia u chow. Ia une u jingbam la song na kawei restaurant ha Khyn dailad.
Kine ki saw ngut kiba la poi hospital ki dei lai ngut kiba dang khyn nah bad uwei rangbah ha kane ka sngi u Blei hadien ba ki mih prie hadien ba la bam ia ki jingbam ba la thied na katei ka Mikado.
“Nga la song katto katne ki jingbam na katei ka restaurant ia I lok jong nga bad ki khun, hynrei hadien ba ki la dep bam ki la sdang ban kynroi prie bad ki la prie bad ngi la mareh bran bran sha hospital,” la ong u Bah A Bareh uba sah ha Nongshilliang.
Katkum ka sertiphiket na Nazareth Medical Officer, ki saw ngut la pynbna ba ki pyndonkam ia katei ka jingbam kaba la sniew, la ong u Bah Bareh haba pyni ia ki kot haba kren sha ki lad pathai khubor.
U Bah Bareh u la iathuh ba kine ki saw ngut ki kynthup I lok jongu, Kong Relangti Suchiang bad lai ngut ki khun Phida Aiti Suchiang (7), Theiwanki Suchiang (6) bad Wankanidale Suchiang (5) la pynlait noh na hospital ha kane ka sngi Hatmajai.
U Bah Bareh u la aiti ia kane sha ka Khasi Students Union (KSU) ha kaba ki dkhot jongka, ki la leit sha katei ka restaurant ba kim bit ban leh kamkai ia ka iap ka im.
U Surja Banerjee u la pdiang ia ka medical report u la rai ban siew ia ka jinglut jong u Bah Bareh kaban long T. 9460 kaba ha ka jingshisha ka jinglut ka longT.14,000.
Ha kajuh ka por, ka KSU ka la pyrshah jur ia kane ka jingleh torti ka restaurant bad maham ia baroh ba ki dei ban husiar ban ym leh thurmur ia ki jingbam kiba ktah ia ka koit ka khiah.