Sam syrnod ka Martin Luther sha ki samla ha ka sien ba khyndai

Shillong, 25 Nailar:
Baroh ki don 550 ngut ki samla ba la sam syrnod da ka Martin Luther Christian University (MLCU) kiba pyndep ia ka kyrdan Graduates, 240 ngut kiba pyndep na University bad 310 ngut kiba pyndep na ki Affiliated Institute ha ka sien kaba khyndai bad la sam ia ki ha ka jingialang hynne ka sng ha U Soso Tham Auditorium.
Ha kane ka jingsam syrnod la donlang u Lat ka jylla u V.Shamuganathan uba long ruh u Visitor kane ka University bad kaPadmashree Bertha Gyndykes Dkhar kaba la ai ia ka jingkren ha kane ka sngi.
La don ruh u Dr. KM Shyamprasad u Chancellor ka University, u Dr. Glenn C.Kharkongor, u Pro- Chancellor, u Bah R.G Lyngdohu Vice-Chancellor, u Donald D.Ingty, Registrar, u Prof. S.K Srivastava u Vice-Chancellor ka NEHU nalor kiwei.
Haba kren ha kane ka sngi, u Lat ka jylla u la pynpaw ia ka jingsngew kmen ia ki samla kiba la lah ban pyndep ia ka jingkyrdan na kane ka skulbah. U la kyrmen ba ka jingpyndep jongki kan long shi bynta ban saindur ia ka lawei ka jingim jongki.
U la ong ba ka jingjop shimet ka long kaba donkam ban noh synniang sha ka imlang sahlang ban rat dyngkhong ia ki jingduk jingkyrduh.
“Ka suin bneng ka dei ka jong phi lada phi don ka thong”, la ong u Lat.
Katba ka Kong Bertha Gyndykes Dkhar ka la ong ban jop ia ka thong, ka donkam ban iaid shibun ki jingeh.