Shah kem u snar HNLC na Umkrem

Jowai, 21 Nailur:
Hadien ba ki pulit ka nongbah Jowai, ki la ioh jingtip kaba tikna, hynnin ka miet ki la hiar sha ka shnong Umkrem ban thwet ia uwei na ki dkhot jong ka seng HNLC bad ha ka jingthwet ki pulit ki la iohkem ia u, na kawei ka iing ki paramarjan jong u kaba u la phetrieh na ki pulit.
Ia utei u dkhot ka HNLC la tip kyrteng kum u Westerland Lamin na ka shnong Umkrem, East Khasi Hills kaba don ha thain khappud India Bangla hajan Dawki.
Ki pulit ki la iathuh ba utei u Lamin u dei u dkhot ka HNLC bad u iarap bha ia ki para dkhot ban kam shiliang na India sha Bangladesh bad ruh u iarap ban pynlang ia ka pisa ba la dawa da ka seng bad ban phah ia ka sha ki heh jong ka HNLC kiba don ha Bangladesh.
U Superintendent of Police jong ka West Jaintia Hills, u R Muthu, haba iakren bad une u nongthoh khubor, u la ong ba hadien ka jingtohkit bniah ia utei u dkhot ka seng HNLC, u la phla ba ki don ki tiar pynbthei kiba u la buhrieh ha shnong Umkrem.
Hadien ka jingphla jong u, ki pulit ka WJH bad ki pulit ka EKH ki la hiar sha katei ka jaka ban leit kurup ia kitei ki tiar pynbthei.
Ka jinghiar ki pulit sha katei ka shnong ka la long kaba seisoh ha kaba ki la ioh ban kurup haduh 40 tylli ki Tikli (detonators), 194 electronic Tikli, 5 song ki  thyllai fuse bad haduh 128 tylli ka Kait bakhor (Gelatin Sticks).
Ki pulit ki dang tohkit bniah shuh shuh ia utei u dkhot ka HNLC na ka bynta ban ioh jingtip bniah shuh shuh shaphang ka seng bad ki kam jong ka kiba lah ban pynthuh ia ka imlang ka sahlang.