Ngam jyllop ar ngut ki samla pule hajan Pynursla

Shillong, 21 Nailar:
Arngut ki samla, ki la shu iap hynnin ka sngi, tang na ka daw, ba ki leit sum ha kawei ka Wah Synrang Hati, kaba hap ha u pud u sam jong ka shnong Laitmynrieng.
Ki lad khubor, ki iathuh ba ki ia don kumba 4,5 ngut ki samla kiba ia leit sum sha katei ka wah bad tang mar ia poi ha katei ka wah, ka samla Heavenly Shangpliang (22), kaba shong ba sah ha Laban bad kaba pule MA ha NEHU, ka la leit jngi ha katei ka pung, hynrei namar ba kam shym la nang bha ban jngi, kumta ka la ngam jyllop bad la iathuh ba u samla, uba ia leit lang, U Gordon Rymmai (23), uba pule ha Synod College, ula leit noh ha um ban iarap ia katei ka samla, hynrei, utei ruh um shym la lah satia ban pyllait im, ia katei ka samla, hynrei ula duh noh ruh ia la ka jongim.
Kane ka jingjia, la iathuh ba ka la jia hynnin ka nohsngi, kaba dei ka sngi ba sniewbok ia kitei ki arngut ki samla.
Shwa jong katei ka jingjia ba sniewbok, la iathuh ba kitei ki lai ngut, ki la ia leit kai shwa sha kiba ha iing ha Langkyrdem bad ha Pynursla ruh kumjuh bad hadien kata, ki sa leit kai sha katei ka wah.
Ki pulit jong ka Pynursla, ki la shimti ia kitei ki met iap, ha kaba la aiti sha kiba ha iing, ynda haba la pyndep ia ka jing eksamin iap ha Civil Hospital. Katei ka wah, la iathuh, ba ka dei kaba bun shyiap bha bad ka dei ruh ka jaka, kaba ki ju don kiwei ruh, kiba la iap kham mynshwa, kiba leit sum bad kiba leit noh iap ha katei ka wah.