28 klur pynlut ka tnad ialehkai 11 tylli ki projek ha u 2012-13

Shillong, 19 Nailar:
Ka tnad ialehkai ka jylla lyngba ka State Sports Council (SSC) ka la shna 11 tylli ki projek jong u snem 2012-13 ha baroh kawei ka jylla Meghalaya. Kine ki kynthup ia ka jingshna ia ka Ding Ramhah (floodlight) ban pynthabah ia ka madan JN Stadium ha East Khasi Hills ha ka jinglut kaba T. 4.99 klur.
Katkum ka jingtip na ka ain wad jingtip, na ka ophis jong ka State Sports Council (SSC), ha une u snem ka sorkar ka la shna ruh ia ka madan phlang plastik ha Ladthalaboh , Jowai ka West Jaintia Hills ha ka jinglut kaba T. 4 klur, ka madan plastik ha Madan heh Mawlai kaba lut T. 4 klur, ka madan plastik ha Mawkyrwat kaba T. 4 klur, ka madan plastik ha Ampati kaba T. 4 klur, ka madan kynjatbol rit ne Futsal ha Khliehriat kaba T. 50 lak, ka madan kynjatbol rit ha Polo, ha Laitumkhrah ha Khasi Hills kiba mar T. 50 lak, bad ruh ha Ampati bad Resubelpara kiba mar T. 50 lak.
Ha une u snem, ka sorkar ka la pynshna ruh ia u lain mareh jri ne synthetic track ha madan JN Stadium ba 5.55 klur.
Haba shu khein lang baroh ha une u snem, ka sorkar ka la pynlut 28 klur tyngka tam eiei.