Ud ki sumo, taksi ba knieh pliang ja ki bos saw sha Sohra

Shillong, 9 Naitung:
Ka jingwan kamai ki bos sorkar (STPS) sha ka thain Sohra ka la pynkhuslai bad pyrshah jur na ka liang ki kali kamai sumo bad taksi.
Katkum ka khubor ba la iohlum, la iathuh ba kine ki bos sakhmut kiba la aiti da ka sorkar ban pyniaid da ki riew shimet, ki la wan iaid ban kamai naduh kane ka taiew ba la dep. Ka seng ki nongniah bad ki trai sumo hapoh ka lama jong ka Sohra Owners and Drivers Association, ki la pyrshah jur namar ba ka jingwan iaid kine ki bos ka la pynsting ia ka pla kamai jongki bad ka la ktah ia ka rukom jongki.
Ha kane ka khyndiat sngi, ki nongniah bad ki trai kali kamai, ka thain Sohra ki la pynher shithi sha u MLA ka thain ba un tuklar ban iakren ia ka sorkar halor kane ka jingwan iaid ki bos sha katei ka thain.La iathuh ba ka jingwan iaid ki bos sha katei ka thain ka long kaba khlem don jingtip mano mano ruh wat u SDO (civil) ruh jong ka Sohra.Na ka liang u nongthoh khubor u la ioh iakren ia u MLA ka Sohra u Bah Titosstar Well Chyne u la ong ba na ka liang jongu, u sngew ba ka bha ba kitei ki bor pyniaid jong ki bos (STPS) kin iasyllok bha ia ki trai bad ki nongniah kali ka thain Sohra ban iakren sngewthuh jingmut shwa ba kin wan kamai sha katei ka thain. U la ong ba ka long kaba shisha ba kan ktah ia ka kamai jong ki sumo bad ki taksi lada wan kamai ki bos. “Nga sngew ba ka bha ban iakren iasyllok iasngewthuh jingmut shwa khnang ban ym mih kano kano ka jingbym iasngewthuh jingmut”, la ong u Bah Titosstar. Lah ban kdew ba ka sorkar lyngba tnad Urban Affairs ka la aiti ban pyniaid ia ki bos (STPS) ha ki kynhun riew shimet hadien ba ka jingpyniaid jong ka Meghalaya Transport Corporation (MTC) ka la phiel.