Jur ka bamsap, ha ka thungkam nonghikai ha SWKH: KSU

Shillong,19 Nailar:
Ka Khasi Student Union ( KSU) South West Khasi Hills ka la kynnoh ba ka jur bha ka jingbamsap ha ka jingthungkam nonghikai ha South West Khasi Hills. Ka la kynnoh ruh ba katei ka jingbamsap ha ka jingthung kam ia ki nonghikai Asst. Teacher ha ki skul sorkar ka dei namarba ka tnad pule puthi kam shym don ia ki kyndon thungkam kiba biang. Ia katei ka jingthur mur ha ka kam thung nonghikai ka KSU ka la ong ba ka la lap ia ka jingjia kaba la jia ha ophis jong u Sub-Divisional School Education Officer, Mawkyrwat ha kaba ia dei bad ka jingthungkam ha Rngikseh Government L.P School.
Ka KSU ka la kynthoh ruh ia ka tnad pule ka bym ju pynbna paidbah haba lait ki kam nonghikai (Contractual Basis) bad ka la kynnoh ruh ba ka tnad kam shym la iaid ia ki kyndon kata ban khot da ka interbiw bad ban thung ia kiba dei hok ban ioh hynrei ka la ong ba bunsien la ju thung beit tang ia ki briew kiba la ioh jingmynjur na ki School Managing Committee ne na ki Heasmaster ne Headmistress bad katei ka la ong ba ka ktah ia ki samla wadkam kiba dei hok ban ioh.
Ka kyrwoh na u Publicity Secretary katei ka seng u samla Lurshaphrang Shangdiar ka la ong ba ka KSU ka la lap lyngba ka RTI ba ka ophis u SDSEO ka la thung kam Asst. Teacher khlem da pynbna paidbah lane khot interbiw bad nalor katei ka ophis u Director of School Education and Literacy ka la thungkam ia ki nonghikai khlem da bud ia ki kyndon jong ka NCTE kaba la treikam naduh ka 23 tarik u nailar, 2010. Ka la ong ba katkum katei ka kyndon ki nonghikai kiba ioh kam ki dei ban pass ia ka HSSLC bad ki dei ban ioh 45% bad ki dei ruh ban pyndep ia ka Diploma in Elementary Education (D.EL.Ed) kaba 2 snem ne 4 snem ia ka Bachelor in Elementary Education ( B.EE) ne 2 snem ia ka Diploma in Education ( Special Education).
Lyngba ka RTI ka KSU ka la lap ruh ba na ki 23 tylli ki skul sorkar ha katei ka District kata naduh ka 23 u jymmang, 2014 haduh ka 9 tarik u jylliew 2015 14 ngut ki nonghikai ba la shah thungkam ki dei ki bym pat biang ia ki kyndon jong ka NCTE. Ka KSU ka la dawa ba ka sorkar ka dei ban peit bniah biang ia kitei ki 14 ngut lym kumta ka la byrngem ba kan leit ban ujor sha ingbishar. Katei ka seng ka la kynthoh ba ka jingbiang ha ka kyrdan pule kam pat biang ban shu thungkam nonghikai hynrei dei ban bud ia ki kyndon kiba la buh da ka NCTE bad dei ban da pynbna paidbah ia ki kam kiba lait bad nangta dei ban khot da ka interbiw khnang ba ki samla wadkam kiba dei hok ban ioh kam kin ioh.