Lah ban nym mih ka result interbiw ki Congress

Shillong, 17 Nailar:
Ka result jong ka jingshah interbiw jong ki MLA,MDC bad ki nong ialam ka Congress ha ki heh ka AICC dang shen, ka lah ban nym satia hynrei ka AICC ka lah ban shu hukum ba pynbeit ia ka jingiapher jingmut hapoh ka party.
Katkum ka khubor ba la iohlum, la iathuh ba ka AICC kan pynneh beit ia u Mukul Sangma kum u Myntri Rangbah ka jylla haduh ban wai syndon kane ka samoi ha u 2018.
Na ki khubor, la sngewthuh ba bun ki nongialam ka Congress kiba kwah ban pynneh ia u Mukul Sangma kum u nongialam namar ba u dang ioh bun ki number kiba kyrshan ia u.
Ar ngut ki heh ka AICC kynthup u Mukul Wasnik bad u CP Joshi ki la pynlong ia ka jingshim interbiw ia baroh ki heh nongialam ka Congress ha kane ka jylla hadien ba la mih ka kynrum kynram kaba jur hapoh ka seng.
Napdeng ki MLA, dei tang u Bah Pynshngain N Syiem uba la kren pyrshah tyngeh hakhmat ki nongialam ka AICC, pyrshah ia u Dr Mukul Sangma. Naduh kane ka jylla haduh ka jingiakynduh jongu ha Delhi, u Bah Pynshngain u la ther beit ia ki kam ba kane ka sorkar ka la leh kaba long pyrshah ia u paidbah.
Dang shen ha ka jingwan phai na Delhi, u Bah Pynshngain uba long ruh u CEM ka KHADC u la ong ba ki nongialam ka AICC kim dei ban sngap tang ia ki briew ba don ha ka sorkar kaba mut ia ka jingbun paidbah jong ki MLA ban pynneh ia ka kam nongialam hynrei ka dei ban sngap ia ka sur jong u paidbah ka jylla.
U Bah Pynshngain uba la wan iakynduh ia ki nongialam ka AICC na Delhi kynthup ia u Vice president u Rahul Gandhi ula phla lut plain ia ka jingbym ler kam kane ka sorkar ba ialam da u Myntri Rangbah u Mukul Sangma.
“Nga la iathuh ha u Vice President ka AICC ia ka jingbym ler kane ka sorkar bad ki paidbah ki la duh jingshaniah ha kane ka sorkar ba mynta”, la ong u Bah Pynshngain.
U la ong ba ka AICC kam dei ban kmen tang ba la bun briew ha ka sorkar hynrei ka dei ban pyrkhat bad sngap ia ka sur jong ki paidbah.
“Ka AICC ka dei ban sngap ia ka jingeh jong ki paidbah ka jylla ban ioh biang ia ka jingshaniah” u la ongbad bynrap ba ka AICC kam dei ban pyrkhat mano ba ioh bun ngut ban bat ia ka bor synshar ha ka sorkar.
“Kaba kham kongsan dei ban sangap ia ka sur jong ki paidbah ka jylla ym ia ki briew kiban shu pyniaid ia ka sorkar ha ka jingbuh langknia pat ia ki paidbah.