Kem biang ki pulit ia u snar tuh

Nongstoin, 17 Nailar:
Ki pulit ka Nong stoin mynta ka sngi, ki la ioh ban kem biang sa ia u wei u snar nongtuh u ba la don kti lang bad ki runar kiba la shah kem ha ki pulit ha ki khyndiat sngi bala dep ban tuh ia ki ophis sorkar bad ki skul hapoh sor Nongstoin.
U Superintendent of Police ka WKH bah S. Nongtnger haba iakren bad ki nongthoh khubor mynta ka janmiet u la ong ba u tei u snar ha ryngkat ki paralok jong u kiba la shah kem ki dei kiba la don kti ban tuh ia ki ophis bad ki skul ba kynthup ia ka Block Nongstoin, Agriculture, Horticulture, DTO Office, Anderton school, Ri Lyngngam school, JJM school, New Nongstoin LP school bad Church of God Upper New Nongstoin.
Shuh shuh u la ong ruh ba ki pulit kila suba jur ba u tei u runar u dei u nongialam jong katei ka kynhun nongtuh hapoh sor Nongstoin bad sha kiwei ki bynta jong ka West Khasi Hills District.
Na ka liang jong ki pulit ki la dep ban register case ia u ha Nongstoin Police Station bad ka jingtohkit ka dang iaid shakhmat.