Ujor ka MPLU, ba shah nion ki nongri syiar

Shillong,8 Naitung:
Namar ka jingbym ryntih ka iew die doh syiar kumba la pynbna ha ki kot khubor ba ka All Meghalaya Poultry Supplier Retailer Association AMPSRA ka la pynkiew dor ia ka doh syiar sha ka T.160 shi kilo ka bym pat pynkhuid bad T.220 shi kilo kaba la dep pynkhuid, katba ha kiwei pat ki jaka kum ka iew polo, Motphran, Iew Mawlong, Khlieh Iewduh bad ha iew Laitumkhrah ki die ha ka dor T.240 ne wat haduh T.250 shikilo.
Ka Meghalaya People’s Labour Union (MPLU) hadien ba ka la ioh ia ka jingujor shaphang katei ka jingbym ryntih ka iew die doh Syiar ka la kynthoh ba kane ka dei ka jingbym lah katei ka seng AMPSRA ban teh lakam bad kane ka jingbym lah jong ka ban teh lakam ka pynar tatien pynban ba lehse ka lah ban dei pynban ka seng shimet jongno re jong no.
Ka MPLU ka la pynpaw ruh ia ka jingsngewkhia halor ka jingshah nion jong ki nongri Syiar namar ba katba ki mar ki mata ki nangkiew naduh ka bam ki syiar, ka bai kit ia ki bad haba die la khein dor tad pat ia ki ha kaba ki la ju die ha ka dort T.85 ne T.90 tyngka shikilo bad mynta pat sha ka T.100 lane T.105 tyngka shikilo katba kita ki Retailer pat ia lade ki die haduh T.120 shikilo ki bym pat pynkhuid bad T.180 shikilo kaba la dep pynkhuid hynrei mynta katei ka dor ka la kiew shuh shuh sha ka T.160 bad T.220 tyngka shikilo. Ka MPLU shen ka la ong ba kan wad bniah ia kane ka seng AMPSRA ban khot ia kren halor kitei ki mat.