Kwah syrnot jaka na JHADC

Shillong, 17 Nailar:
Ka Jaintia Students’ Union (JSU) Sengkmie kum shi bynta ban bud dien ia ka jingdawa na ka JHADC ban ai noh hi  ia ka Non emcumbrance Certificate sha ki paidbah, kumta hynnin ka 16 tarik ki jingialam jongka Union, ki la iakynduh ia u Deputy CEM ka JHADC  u A.A Shullai hapoh ka kamra treikam jongu.
Ha kane ka jingia kynduh, na ka liang u Deputy CEM u la kren pyntikna sha ki nongialam jongka Union ba ka EC jongka JHADC ka la dep iashong pyrkhat halor kane naduh kine ki khyndiat bnai ba la dep ha kaba ka EC ka la rai ruh ban pyntreikam ia kane kumba la dawa da ka JSU bad ha ka juh ka por na ka liang jong u u la ong ruh ba kaba sah mynta ka long sa tang ka bynta jongka Law Department jongka JHADC ban pynjanai shuh shuh  ia kane ka rukom ai ia kane ka syrnot bad mar syn dep na ka Law Dept kane ka jingai ia kane ka syrnot da ka Council kan treikam noh.
Shuh shuh u Dy CEM u la bynrap ruh ba ka council (JHADC) ka dei kaba don hok ban ai ia kane ka syrnot sha ki paitbah kiba donkam na ka bynta ban shim ram na ki Bank da kaba pynshah ia ka khyndew jongki, namar dei ka Council kaba peit ia ka ka khyndew ka shyiap katkum ka riti synshar  6th Scheduled jongka riti synshar ka ri India.