Pyrshah ka RBYWO halor ka Wine Store ha Umroi

Nongpoh, 12 Nailar:
Ka Ri Bhoi Youth Welfare organization (RBYWO), Sengkmie, ka la pynpaw ia ka jingpyr-shah kaba jur halor ka jingdon jong ki katto katne ki riew shimkabu kiba thmu ban buh Wine Store hapoh jong u pud u sam ka Umroi Constituency, Ri Bhoi District.
Katkum ka kyrwoh ba la phah da u Bah Amberlight Masharing, President ka RBYWO, Sengkmie bad u Bah Banpynskhem Kharnaior, la ong ba ka seng ka dap da ka jingsngewkhia halor ka jingjyllei jong ki kam sniew katba nangmih ki sngi bad lada kane ka jingthmu da ki riew shimkabu ban buh syndon da ka dukan kyiad (Wine Store), ka la nangpynjot shuh shuh ia ki khun samla ha katei ka thain, khamtam eh ia ki khynnah skul bad ki samla kiba dang don hapdeng bapher bapher.
Kumne kitei ki briew ki don ia kaba kum katei ka jingpyrkhat da kaba buh syndon da ka dukan kyiad hapoh jong katei ka thain, namar bunsien hi ka jingdon jong ki dukan kyiad ka pynjot ia ki khun samla bad kumjuh ruh ka ju wanrah ruh ia ka jingia jot iapra ha ki longing longsem, hynrei khamtam eh kaba ktah wat ha ka imlang sahlang ha ka shnong ka thaw, la buh jingkylli kitei ki nongialam ka RBYWO.
Kumta ka seng, ka la kyntu ia ki paidbah nongshong shnong, ki seng longkmie bad ia ki sengbhalang bapher bapher ba kin buh ia ka jingpyrshah bad ban ym ailad halor kane ka jingthmu jong ki riew shimkabu ban buh dukan kyiad ha katei ka thain, ha kajuh ka por ka seng ka la maham ruh ia ki Nongialam Shnong, ki Nongialam Raid ba kim dei ban aibor ne ai (NOC) sha kitei ki briew kiba thmu ban wanrah dukan kyiad ha katei ka thain, pynkut ka kyrwoh na ki nongialam ka RBYWO.