Kaweh ki lama iong, na ki Taxi kamai ha Shillong

Shillong,11 Nailar:
Ki lama iong ki la kaweh na ki Taxi kamai kiba iaid ha kylleng ka sor Shillong bad ha khapsor mynta ka sngi, la iohi ba ki kali kamai ki teh lama iong ha ki kali jong ki ban pyrshah ia ka sorkar, namar ba ka jingkiew kynsan ka Insurance na ka T.6756 tyngka sha ka T.13,300 tyngka mynta u snem 2016.
Katei ka jingpyr-shah ka dei ruh namar ka jingioh lad ki kali ba nabar jylla kiba kit ia ki nongjngohkai pyr-thei kiba wan sha kane ka jylla ban iaid katba mon ha kano kano ka bynta jong ka jylla kaba ki kwah ban leit. Ha katei ka jing-deng lama iong la iohi ba da ki hajar tylli ki Taxi kamai kiba iaid ha Shillong, ki la ia shim bynta bad ki kit ia ki nongleit nongwan na ki jaka bapher bapher ryngkat ka jingteh lama iong.
Katba ka jingdeng lama iong ka dang iaid ki nongialam jong ka East Khasi Hills Local Taxi Welfare Association, ki la leit ia kynduh ia u myntri ka kit ka bah ka sorkar jylla u bah HDR Lyngdoh ban ai ha u ia ka jingthoh kaba ki la thoh ia ki mat jingdawa jong ki. Ha ka jingthoh sha u bah HDR kaba la soi da u General Secretary katei ka Association u bah Wandonbok Jyrwa bad u bah HJR Lyngdoh, President katei ka kynhun ka la ong ki Taxi kamai ki hap ban siew bun ki khajna sha ka sorkar pynban ka sorkar ka pynshlur da ki kali sawkhmut jong ka ha ka kyrteng ban pynmyntoi ia ki paidbah khlem da don ki kot ki sla kiba biang bad katei ka long pyrshah ia ki kyndon aiñ ka Motor Vehicle Act 1988.
Katei ka seng ka la kdew ruh ia ka jingpynbun ki pulit ia ki lynti bym shah iaid lane ki No Entry,ki jaka bym shah ieng kali (No Parking) bad kumjuh ruh ki jaka bym shah ieng kali ( No Stoping Zone), ha kaba ym shym la lah ia ki kali kamai ban iaid katba ki kali shimet pat ym shym la khang satia bad ki la ong ba katei ka ktah jur ia ki kali kamai kiba siew khajna. Ka la dawa ruh na ka sorkar ba kan bthah ia ki bor pyniaid skul ba kin pynbun ia ki bos on skul ne shaw skul khnang ba ki kali sorkar ne ki kali shimet kin ym ioh phngian shaba palat namar ba kane ka wanrah ia ka jingdheng kali.
Katei ka seng ka la kren ruh ia ka jingioh lad ki Hotel ban kamai da ki kali shimet jong ki da kaba kit ia ki nongjngohkai pyrthei kylleng ki jaka bad katei ka ktah ia ka kamai jong ki. Ki la dawa ruh na ka sorkar ba ka dei ban pynbna ia ka 12 tarik u rymphang manla u snem kum ka sngi ki nongniah kali naba ki nongniah kali ruh kin sngewsarong ia ka jingshakri jong ki ia u paidbah bad ba kin ioh rakhe shisien shisnem ia katei ka lyngkhuh sngi jong ki.