Jrong than u lain Aircel

Shillong,9 Naitung:
Ka ophis jong ka Aircel ka la khapngiah mam ,ha kaba ki paidbah kiba wan donkam sha katei ka ophis ki hap ban ieng da u lain uba jrong ban pyndep ia ki jingdonkam jong ki. Haba ia kren bad katto katne ngut ki paidbah hato kane ka jingieng lain ka long man ka sngi ne tang mynta ka sngi , ki la iathuh ba manla ka sngi ka long beit kumne , don ruh napdeng jong ki kiba la iathuh ba ki la wan la arsien lai sien, hynrei namar ka jingjrong palat u lain, ki hap ban beh kam noh shawei da ka jingkyrmen ban wan pyndep ha kawei pat ka sngi-phewse ynda ki la wan ha ka sngi kaba bud ruh ka long hi kumjuh.
Haba la pyrshang ban bniah ia ki hato ym don shuh ka ophis Aircel da kawei pat ba la pynlong ia ki ban wan tang ha kane kawei ka ophis kaba don ha them Bijoy, ki paidbah ki la iathuh ba ki ophis Aircel kiba khamjan ia ka iew ki la khang lut , wat ka ophis bah kaba don ha Police Bazar ruh ka la khang dam bad mynta lei don sa tang katei kawei.
Ki paidbah kiba pyndonkam Aircel tang hangne hapoh sor Shillong, ki la bun bah lait noh ki nongkyndong, hynrei wat hapdeng ka jingbun ki nongpyndonkam ki paidbah ki la kynthoh ba ka jingdon tang kawei ka ophis heh ha ki thain jong ka iewduh bad Motphran ka pynjynjar ia ki ba bun ba lang kiba hap ban beh ia bun tylli ki kam ha ka shi sngi bad ka long kaba eh ia ki ban ynlut por ban leit ieng lain hangtei.