Wat pynshit ia ki nonghikai, ba kin pep skul, ong ki Managing Committee

Nongstoin, 11 Nailar:
U nongai ktien jong ki School Managing Committee West Khasi Hills U Babu Hopestandard Myr-thong haba kren sha ki lad pathai khubor mynta ka sngi, u iathuh ba ki Managing Committee jong ki School bapher bapher ki la ialum lang mynta ka sngi ha Nongstoin ha kaba ki la Seng ia ka Synjuk jong ki bor pyniaid School bad la ai kyrteng ia ka da ka “School Managing Committee Organization, West Khasi Hills” bad ka jingthmu ba kongsan eh ka long ban ieng tylli lang kawei ka buit kawei ka bor ban thom pyrshah ia ki bor kiba thmu ban pynjot pynpra ia ki School Managing Committee.
Katei ka Synjuk ka pyrshah lamler ia ki MC ba ki khate nonghikai bad kane ka Synjuk ka kyrpad ia ka Sorkar ba ka dei ban tip nyngkong ia ki School Managing Committee, haba shim ia kino kino ki rai ha ka jingiadei bad ki nonghikai ne ki School.
Kane ka Synjuk ka maham jur ia kino kino ki Seng ba kin pynshit ia ki nonghikai ba kin pep skul ne pep eksamin, tang ban pynhun ia u khmia la jong bad lada ki nonghikai kin sngap ia ki bor pynjot pynpra ki SMC kin ym kit khlieh ia ka iap ka im jong ki. Kumta ka Synjuk ka iawer ia baroh ki SMC ba kin iawan lang baroh ha ka 26tarik Naiwieng 2016 hapoh Christ Disciple Girls Secondary School Upper New Nongstoin ba shim ia ka jingmynjur ban leit buh ha khmat ka Sorkar.