Leit dorbar U CEM sha hima Mylliem; ym lah rai ia ka khlaw mawpat

Shillong, 10 Nailar:
Ka Hima Mylliem ka la lum Dorbar mynta ka sngi ha ing dorbar jong ka, kaba don ha Mawkhar. Ha katei ka dorbar la wan ruh u Chief Executive Member (CEM) ka KHADC u bah Pynshngaiñ N Syiem ryngkat u EM ka pla tyngka u bah Antonio War. Katei ka dorbar ka dei kaba la khot ia baroh ki bakhraw ka Hima Mylliem ba kin ia donlang bad kiba la poi dorbar ki don kumba 30 ngut eiei.
Haba kren sha ki nongthohkhubor hadien ba la wai ka dorbar u Acting Syiem ka Hima Mylliem u Pa’iem Ricky Nelson Syiem u la ong ba la khot ia katei ka dorbar na ka bynta ban ia kren ia ka jingai lum jingtep ka Hima Mylliem sha ki balang bapher bapher ha khlaw Mawpat; hynrei u la ong ba ym shym la lah ban shim rai eiei namar ba haduh mynta ki dang hap ban ap ia ka ripod jong ka komiti tohkit kaba dang iaid shakhmat ia katei ka kam. Ha kajuh ka por u CEM ka KHADC u la ong ba kham mynshuwa la ai por ia ka komiti tohkit ba kan pyndep ia katei ka kam hapoh 6 bnai bad ia mynta u la ong ba hap ban ap shuwa katto katne por ia kaei kaba mih na ka jingtohkit.