Shah pynbiej lynti rel ha U MR, ong ka KHNAM

Shillong, 10 Nailar:
Ka North-eastern Railway Frontier ryngkat ka Sorkar Jylla ka la iaid shaid shaid sha khmat ban pyndep noh ia ka lynti rel ha Meghalaya. Naduh ki snem ba la dep la ioh-sngew shibun ki jingpyr-shah ia ka lynti rel ha ka nongrim ba ka jingwan jong ka rel kan nangplie lad ia ka jing jyllei ki mynder ri.U MR ka jylla u la kular ban wanrah ia ki ain ki ba khlain ban khanglad ia ka jingrung kyrthep ki mynder shwa ban iaid sha khmat ia kane ka project, hynrei katei ka long tang ki kyntien pynbiej ia u paidbah, namar haduh mynta ym pat iohi ia kita ki ain ki ba khlain, ong ka kyrwoh jong ka KHNAM. Katei ka seng, ka ong ba ka jing pynkhreh pat ia ka lynti rel, ka ka la iaid shaid shaid shakhmat, imat kane ka sorkar kam kwah ban teh lakam ia ki mynder, hynrei ka pyrshang ban nang pynjubor ia ka jingtuid ki mynder. U MR ka jylla bad ki myntri jong u ki long ki ba kloi ban set kyllut ia la ki jong ki skhor bad tap ia la ki jong ki khmat ha ki issue ki ba ki paidbah ki dawa, lada dei ka jingdawa jong ki nonghikai skul ia ka hok jong ki, ka jingdawa jong ki contractor ia ka hok jong ki, ka jingdawa jong ki samla pule ia ka bai bam jong ki, ka jingdawa ban wanrah ia ka polisi jong ka pule puthi, ka ai kam ai jam, ka lad iarap ia ki samla bad kiwei kiwei, hynrei lah kwah dik dik ban pyndep noh ia kane ka lynti rel, ka ba la pyrshah da ki ba bun.