Mad jingeh ka Mawsynram bym treikam bha ka Iing dak

Shillong,9 Nailar:
Ki paidbah ka Maw-synram kiba jut hep pisa hapoh IIng dak, ki la mad ia kiba bun ki jingeh namar ka jingbym pyllait biang por ia ki scheme ba ki paidbah ki ioh kaba hap ban iaid lyngba ka account jong ki kaba ki thep ha post Office. Halor katei ka jingjia ka kyrwoh na ka FKJGP Mawynram Circle ka pynpaw ia ka jing- sngewkhia kaba jur halor ka jingbymlah bad suki treikam palat jong ka Post Office kaba don hapoh ka Shnong Mawsynram kaba la wanrah iaka jingeh jongki ba bun ba lang khamtam ia ki paidbah kiba ju kynshew pisa ha katei ka ophis.
Katei ka seng ka la ong ba ki paidbah kiba dei ban ioh jingmyntoi lyngba ka Chief Minister Social Assistance Programme (CMSAP) bala pyntreikam da ka tnad Social Welfare Department jong ka Sorkar Jylla lyngba ka ophis jong CDPO kaba don hapoh ka Shnong Mawsynram. Kane ka skhim ka iarap ia kito ki paidbah kiba wan naki longing kiba duk ha kaba ki dei ban ioh bynta kum ha ka bai bam tymmen ka skhim iap lok, ka skhim naka bynta ki briew kiba duna ha ki dkhot met ka jongki , bad kumjuh ruh naka bynta ki longkmie kiba shong marwei bad la ki khun.
Ka FKJGP ka la ong ba ka la leit ban iakynduh markhmat ia u Post Master, S. Kynshikar ha kane ka Post ophis hangtei hapoh Mawsynram, ha kaba la pyrshang ban kylli bniah bad tohkit ia kaei kaba la pynpaw da kiba bun kiba dei ban ioh ia kane ka skhim hynrei la ioh jubab ba ka daw kaba la pynlong ia ka ophis ban suki ka rukom treikam ka dei namar ka jingduna palat ki nongtrei bad nalor kata ka jingbun palat kiwei pat ki jingsiew kiba wan na kiwei ki tnad bapher bapher jong ka Sorkar. Katei ka seng ka la ong ba kiwei pat ki paidbah kiba thep pisa ha SBI ki la ioh lut katba kiba thep pisa ha Post Office kim pat ioh satia.