“Kem mardor ia kiba pyniap ia ka samla”

Shillong, 08 Nailar:
Ka UDP Youth Wing ka East Khasi Hills ka la thoh shithi sha u SP ka East Khasi Hills ba ki pulit ki dei ban trei tyngeh ban kem mardor ia kiba donkti ha kam runar ba shyrkhei ban shim ia ka jingim jong ka samla Wandarihun Mawlong kaba na Um-lyngka.
Ha ka shithi sha u SP u general secretary ka UDP East Khasi Hills u Bah Hamletson Dohling u la ong ba ka long ka jingkyndit kaba shyrkhei bad suhjer ba ki kynthei ki shah pyndik bad shah pyniap na ka por sha ka por ha kane ka ri bad kane ka jingeh ka dei ka kamram jong ki pulit ban pynleit jingmut bha lym kumta ki briew khamtam ki kynthei kin duh jingshaniah ha ki pulit.
Ka jingjia dang shen ha kaba ka samla na Umlyngka ka la shah pyniap ba la ioh tam ia ka met iap jong na Mawdum hajan ka pung Umiam ha ka 29 tarik u bnai ba la dep ka dei ka jingjia ba shyrkhei bad ka tnad pulit ka dei ban pynsted ban tohkit bad ban wanrah ia ki runar ha ka kti ka ain.
“Ngi dawa ba ka tnad pulit ka dei ban leh da kaba tyngeh ia kito kiba donkti ha kum kane ka kam ba shyrkhei khnang ba kiba haiing hasem bad ki kmie ki kpa jong ki khun kynthei kin sngew shngain”, la ong u Bah Hamlet Dohling.