Yn kynmaw Mother Teresa ka Shillong, da ka tamasa Phlim

Shillong,8 Nailar:
Ki ri bapher bapher ha satlak ka pyrthei kumjuh ka nongbah Shillong kin kynmaw ieit ia ka Mother Teresa da kaba pynlong da ka tamasa phlim. Haba kren sha ki nongthohkhubor u Director ka Mother Teresa International Film Festival (MTIFF) u Fr.Francis Stephen u la ong ba kin don haduh 50 tylli ki ri ka pyrthei ki ban pynlong ia katei ka tamasa katba ha India pat yn pynlong ha ki 100 tylli ki jaka ka ban sdang na Kolkata ha ka 26 tarik mynta u bnai bad nangtei kan tyllun haduh hynriew bnai kynthih sha kiwei pat ki jaka, katba ha ka thaiñ shatei Lam mihngi pat yn sdang naduh ka 6 tarik haduh ka 9 tarik u nailur ha State Central Library, Shillong bad kan iaid sha kylleng ki jaka ka thain shatei lam mihngi haduh ka 25 tarik u rymphang, 2017.
Ha katei ka tamasa kumba long haduh mynta ki don 22 tylli ki phlim kiba yn pyni paidbah hynrei ar tylli pat na ki, ki dei ki phlim kiba lah ban pyni tang hapoh Kolkata katba ki 20 tylli yn pyni kylleng kylleng. Hapoh India katto katne tylli ki nongbah kiba yn pyni ia kitei ki phlim ki long ha Delhi, Mumbai, Chennai, Bengaluru, Udaipur, Guwahati, Patna, Indore, Ranchi bad saw tylli ki nongbah ha Kerela, ha kiwei pat ki ri ki jaka kiba yn pyni ki kynthup ia ka UK, Malaysia, Ireland, Italy, Australia, Thailand, Myanmar, Bangladesh, Sri Lanka bad ka China. Ha kane ka jylla ia kitei ki phlim yn pyni ruh ha sor Jowai.
U Phadar Stephen u la ong ba ka jingmut ban pynlong da katei ka tamasa phlim ka long ban wanrah ka jingiaieit iwei ia iwei bad ban bud ia ka nuksa jong ka Mother Teresa kaba la shakri ia ki duk ki raitoi bad kiba pang ba shitom ha surok bah ka nongbah Kolkata haduh 45 snem. U la pynkynmaw ruh ba ka la ioh ia ka Noble Prize for Peace ha u snem 1979 bad ka la iap ha u snem 1997 bad yn u Pope Francis un pynbna ia ka kum ka riewkhuid ha ka 4 tarik u nailur ha Vatican City.