Wat pyndonkam Aadhar, ong ka KSU

Shillong, 3 Nailar:
Ka Khasi Students Union, ka la thoh sha U Ma RC Laloo, myntri ka tnat pule puthi jong ka sorkar Jylla, ha kaba iadei bad ka sobjek Aadhar, ha kaba la pyni ha ki kotkhubor, ba kito kiba kwah ban thep bai bam, na ka bynta u snem 2016-17, ba ki dei ban thep ruh ia U Aadhar number bad katei ka long katba kum ka jingbthah jong ka tnat pule puthi jong ka sorkar Jylla.
Ka KSU, ka pynsngew, ba ka hukum jong ka Supreme Court, kaba 15tarik Risaw 2015, ka kren shai ba kam long kaba dei ban pyntrei kam naphang ia U Aadhar bad la ong namarkata, ba katei ka dei ka jingpynbna, kaba long pyrshah ia ka hukum jong ka kashari. La ong ruh ba ka jingweng noh ia U Aadhar, ha kaba iadei bad ka jingsam lyer shet, ha ka Jyla, ka dei hi, na ka bynta kajuh ka daw.
La ong ba kane ka sobjek, ka la sahteng noh, haba ka Union, ka la rah ia kane ka mat bad u myntri rangbah ka Jylla, ha kaba la pynsngew ba dei ban pynshai bha shwa sha ki paidbah, halor ka jingsngewthuh bakla ia utei U Aadhar Number. Ka KSU, ka dawa, namarkata, ba dei ban pyllait noh, ia utei u number Aadhar, khnang ba kan nym mih ka jingeh, ia ki samla pule, kiba lah ban shim, ia katei ka lad kaba dei bad ka jingioh bai bam na ka Sorkar, ong ka kyrwoh na U bah Daniel Khyriem, President bad U bah Auguster Jyrwa, General Secretery ka KSU.