Pynsangeh Aadhar, ong U MLA

Shillong, 03 Nailar:
U MLA ka Sohra u Bah TW Chyne u la ther ia ka sorkar kaba la pynmih ia ka hukum ba baroh ki khynnah skul, ki saml pule ki dei ban don Aadhar number ban ioh ia ka baibam.
Haba pynlait khubor halor kane, u MLA ka Sohra u la ong ba u la ioh ia ka jingud jong ki kmie ki kpa jong ki khynnah skul ba ka jingpan Aadhar number ka sorkar ka la buh jingeh ia ki bad ki lah ban duh ia ka baibam.
“Ki khynnah skul, ki samla pule bun kim pat don Aadhar number, shaei kin leit ioh Aadhar mynta mynta, nga pyrshah jur ia kane ka jingleh ka sorkar”, la ong u Bah Chyne.
U la ong ba nalor ka jingpan ia u Aadhar number, ka tnad pule puthi ka jylla, ka la bthah ruh ba dei ban pyndap online ban ioh ia ka baibam. “Sha nongkyn-dong ym don internet bad bun kim pat da nang bha ban leh ia kane, kumno kin leh online”, la ong u MLA ka Sohra.
U la ong ba ka sorkar jylla ka dei ban pynsangeh noh shwa ia kane ka jingpang ia u Aadhar number bad dei ban leh kumba ju leh shwa haduh ban da pynbeit da kumwei pat, khnang ba kan nym pynduh lad ia ki samla bad ki khynnah skul ban ioh ia ka baibam jongki.