Ka ain shong wai ha ka dorbar ban wan

Shillong, 3 Nailar:
Ka jingialang jong u Myntri Rangbah u Mukul Sangma bad ki 13 sengbhalang halor ban khang rung laitlan ia ki briew nabar, ka la mynjur ba ka sorkar ka dei ban pynlong ain noh ia ka Bill shongwai iing ha ka jylla ha kane ka dorbar ban sa long ha u Nailur ban wan.
Ia ka Meghalaya Residents Safety and Security Bill bad ia ka Meghalaya (Banami Transactions Prohibition) (Amendment) ba la wanrah da ka sorkar ha iing dorbar kham mynshwa, la aiti ha ka Select Committee ka iing dorbar ban pule bniah shwa ban pdiang daka iing dorbar.
U Myntri Rangbah ka jylla u Mukul Sangma hadien ba la wai ka jingialang, u la ong ba ka jingialang bad ki 13 seng, ka la iatai ia ka jingiaid shaphrang ki kam ki jam halor ki kyndon ban tehlakam ia ka jingwan rung ki briew nabar sha kane ka jylla.
Ki 13 seng kiba la dawa ban thaw ain ban khang lad ia ki briew nabar ban shu wan rung laitlan, ki la dawa ba haba ka sorkar ka thaw ia ka ain, kam dei ban buh diengpynkiang ia ki trai shnong hynrei ban teh ban khum beit tang ia ki briew ba wan nabar.
“Ka Select Committee kan shong noh wut wut hadien ba la rakhe ia ka sngi Laitluid ka ri shwa ban long ka dorbar ha u Nailur ban wan”, la ong u Myntri Rangbah.
Ki dkhot ka Select Committee ki long Bah Metbah Lyngdoh, Bah Ardent M Basaiawmoit, u John Leslee K Sangma, u Dr Jemino Mawthoh, Bah Hopeful Bamon, u C Momin, u Saleng A Sangma, u Bah Embhahlang Syiemlieh bad u Nihim D Shira.
Ki sengbhalang ki la dawa na ka sorkar ba ka dei ban pynthikna ba haba ka thaw ia kine ki ain, kam dei ban buh jingeh ia ki trai jaka trai muluk.
“Ngi la ban ia ka jingdonkam ban pynthaw ia kine ki ain kiba khlain” la ong u President ka FKJGP Bah Joe Marwein ha ki nongthoh khubor hadien ba la wai ka jingialang.
U President ka KSU Bah Daniel Khyriem u la ong ba ki 13 seng kin aiti ia ki jingai jingmut jongki sha ka sorkar ha ka jingialang ka ban long biang ha ka 16 tarik Nailar.
U Bah Khyriem u la kyntu ia ki paidbah ban ai ia ka jingkyrshan ia kane ka jingdawa jong ki seng khnang ba kan long kaba jop.
Hynrei ha kajuh ka por, u la ong ba ki sengbhalang kin nym ailad satia lada ba ka sorkar ka thaw ia ka ain ka bym iahap kumba la dawa da ki paidbah. “Ngin sa bishar ia ka ain bad lada kam biang, ngin hap ban dawa ban weng ia ki kyndon bym iahap ia ki trai jaka trai muluk”, u la ong.