Paw ka dur diengphna bad rosari, na ka um baptisma

Shillong, 1 Nailar:
Ka la don ka jingsngew lyngngoh jong kiba bun ha ka peij facebook, halor ka jingpaw jong ka dur rosari bad ka diengphna, ha ka dur, kaba ai baptisma ia iwei I khyllung, ha ka shnong Mookhap, kaba hap ha ka Parish Mookyndeng.
Hadien, ba la iohi, ia katei ka dur U Rupang, ula iakren ia U Fr Alexsius Dkhar, uba dei U Lyngdoh Niam jong ka Parish Mookyndeng, ha kaba ula iathuh ba katei ka dei ka dur, kaba la pynbaptis la ar bnai mynshwa bad um kynmaw shuh ruh, la itei iba la ioh baptisma, i dei I khun shynrang ne I khun kynthei.
U Phadar, u iathuh ba ynda u leit biang sha katei ka shnong ha ki khyndiat sngi ba ladep, ki la pyni ia katei ka dur, kaba paw kum ka dur rosari bad ka diengphna. Ki briew jong katei ka shnong, ki la pyni ia katei ka dur ha U Phadar, ha kaba ki ruh ki shim, ba ka dei ka kam phylla bad ula ong “Ki iakmen” ia katei ka dur. U Phadar te, ula ong “Ngam tip, ym lah ban ong eiei”, kaba mut, la ka dei ka jingleh phylla U Blei ne ioh lehse, kam dei.
Haba peit ha ka dur ha ka liang ka mon, la pyni, ia ka klat, kaba la theh um, ha kaba ka dei ha ka por jong ka jingleh ia ka jingpyn baptis, da U Fr Alexsius ba ka tuid ka um na shyllang jong itei I khyllung bad ba ka jingtuid ka paw, ha ka dur jong ka diengphna bad jong u rosari.