Mynjur pynkiew tulop ia ki babu adhoc

Shillong, 01 Nailar:
Ka jingialang ka kynhun myntri hynne ka sngi kala pdiang ban pynkiew ia ka tulop jong ki nonghikai skul Adhoc jong ki Secondary skul na ka 10 hajar shi bnai sha ka 20 hajar shi bnai bad 24 hajar na ka 12 hajar shi bnai ia ki nonghikai ha ki higher secondary skul.
U Symbud Myntri Rangbah ka jylla ba peit ia ka tnad pule puthi u Dr RC Laloo u la ong ba ba ka sorkar ka la rai ban pynkiew ia ka tulop jong ki nonghikai skul adhoc haduh 100 percent ha baroh ka jylla na ka bynta ki secondary bad higher secondry skul.
“Ki nonghikai ha ka secondary level kin ioh noh 20 hajar ha jaka 10 hajar shi bnai bad ha ka higher secondary level, kin ioh noh 24 hajar ha jaka 12 hajar shi bnai”, la ong u Bah Wahlang.
Ki nonghikai sobjek Saian kin ioh noh 22 hajar ha jaka 11 hajar shi bnai, u la bynrap.
Kane ka rai jong ka sorkar kan ai jingmyntoi ia 1068 tylli ki skul bd 3212 ngut ki nonghikai. Bad ka jinglut ka sorkar na ka bynta kane ka la kot sha ka T. 40.29 klur ha ka shi snem.
U la ong ba ki don 2163 ngut ki nonghikai skul adhoc ha Secondary ha ki 380 tylli ki skul, 434 ngut ki nonghikai ha higher secondary na ki 70 tylli ki skul, bad 610 tylli skul Science ba kynthup 611 ngut ki nonghikai ban ioh jingmyntoi na kane ka jingpynkiew tulop thymmai ka sorkar.