Ka jingialang ka bym poi shaei shaei ruh, ong kiba kyrshan surok

Shillong, 01 Nailar:
Ka Joint Action Committee of Twolane Road (JAC-TR) kaba kyrshan bad kwah ia ka surok Two Lane ka la pynpaw ia ka jingbym sngew hun bad bym sngew tynnad ia ka jingiakren hapoh ka jingialang kaba ka khot ka KHADC hynne ka sngi.
Haba kren sha ki nongthoh khubor hadien ba la wai ka jingialang, u secretary ka JAC-TR u Bah Sandy Myrthong u la ong, “Ngim sngew hun ia ka jingialang, ym shym la ailad ia ngi ban kren ban pynsngew hynrei ki la shu niom beit ia ngi”.
U la ong ba ka JAC kam shym la kyrshan satia ban tih uranium bad ka pyrshah jur ruh ia ka jingkhot Expression of Interest (EOI) ka UCIL ban tih uranium hynrei ka donkam ia ka surok kaba dei u budlum ka roi ka par namar ba ka dei kawei na ki jaka ba sahdien bha ha ka jylla.
“Ngi la tyrwa ha ka jingialang ba da kano ka lad ngin ia thaw ban pyrshah tih uranium tangba khlem da khang lad ban shna surok, hynrei ym don ba sngap”, la ong u Bah Sandy.
U la ong kim nym sangeh ban dawa ia ka surok hynrei ym ia u uranium bad kin leit ban iakren bad khot ia ka jingialang paidbah ka thain ban shim ia ka rai halor ka jingmih na kane ka jingialang.
“Ngi pdiang beit ia kano kano ka kam pynroi wat ia ka T. 20 klur ka KHADC kaba la kular ban pynbha ia ka surok ha katei ka thain hynrei tang kane ka pisa kan nym lah ban pynbha ia ki surok kiba sniew jubor ha katei ka thain”, u la bynrap.