1 tarik yn deng lama iong, ka FKJGP ha Mawkyrwat

Shillong,29 Naitung:
Hadien ka jingtur kynsan ka KSU sha KHA DC ha ka 28 tarik mynta u bnai namar ka jingai NOC ia ki 7 tylli ki projek surok , mynta katei ka ding NOC ka la nangpur ha kylleng ka jylla. Bun tylli ki sengbhalang ki la kyn-thoh ia ka KHADC kham-tam ia u khliehduh jong ka u bah Pynshngaiñ N Syiem ( CEM) namar katei ka jingai NOC kaba kyndit kyndit kaba bun na ki MDC kiba don hapoh ka PDF kim don jingtip satia.
Katei ka jingbitar ki sengbhalang ia ka KHA DC ka la pur ruh shaduh sha South West Khasi Hills District ha kaba ka seng FKJGP ka la pynbna ban sdang ia ka sienjam ia khih jong ka da ka jingdeng lama iong bad kan pyndeng ruh ia ki paidbah kum ka dak ka jingpyrshah ia katei ka jingai NOC ka KHADC ia ki projek surok kiba katei ka seng ka la shim ba kitei ki surok ki dei ki lynti ki ban pynpoi sha ka jingtih Uranium.
Ka FKJGP ka la shim ia katei ka rai ha ka jingialang ki nongkitkam ba hakhmat jong ka kaba la long mynta ka sngi ha ka skul Church of God, Mawkyrwat. Ha katei ka jingialang kaba sengkmie ka la khot ia ki nongkitkam hapoh katei ka District la donlang ruh u President rangbah katei ka seng u bah Joe Marweiñ bad kiwei pat ki nongialam ba kham hakhmat.
Hadien ba ki nongialam jong katei ka seng ki la ia kren sani bha la kumba katto katne kynta shaphang katei ka mat ( projek surok bad Uranium) ki la shim ia ka rai ban sdang da ka jingiakhih kaba jai jai kata ban pyndeng lama iong. Katei ka jingiadeng lama iong ha ka lah sngi u blei kan sdang na ophis katei ka seng ha ka por 9 baje mynstep bad ter ter kin rung ha ki ophis sorkar ban pyndeng ia ki nongtrei sorkar bad ki paidbah katei ka thaiñ.