Pynrem CEM ka Mawsynram

Shillong,29 Naitung:
Ka Joint Action Committee, Mawsynram border Area bad ka Bharatya Janata Party, Mawsynram ki la ther tyngeh ia u CEM ka KHADC u bah Pyn-shngaiñ N Syiem uba dei ruh u MLA/MDC jong ki namar ka jingai jing-mynjur, ban shna ia ki projek surok ha South West Khasi Hills.
Ka kyrwoh khubor na ka JAC lyngba u Kyllang Thongni, chairman u la ong ba ka JAC ka kyrshan ia ka jingiakhih ka KSU ban pyrshah ia ka jingai NOC ka KHADC bad ka la kynthoh da kaba ong ba kitei ki surok ki dei ki ban pynpoi sha ka jingtih Uranium. Katei ka JAC ka la ieng pyrshah da kaba pyni ia ka nongrim ba lada jia ba tih Uranium ki paidbah ba sah ha khappud kin sa shah ktah lang.
Ha ka juh ka por ka JAC ka pynpaw ka jingsngew lyngngoh ia ka jingleh kyrkieh u CEM ka KHADC uba dei u MLA/MDC ka Mawsynram konstitwensi uba la ai NOC tang shisngi hadien ba u la wanphai na New Delhi kane ka la pynlyngngoh ia ki paidbah ka thain. Ka kyrwoh ka la ong ruh ba ha ka jingshisha ka long kaba dei eh ia u CEM ban pynsngew sha ka sorkar ba ka thaiñ ka don par Umphniang kaba lah ban pynmih bun ki jingmyntoi ia ka thaiñ hynrei ka la kynnoh ba u ai NOC pynban ia ak surok ka ban tih ia u Uranium.
Ha kawei pat ka khubor ka Bharatiya Janata Parta, Mawsynram Mandal, East Khasi Hills ka la pynrem jur ia u Bah Pynshngain N Syiem uba dei u CEM ka KHADC namarba u la shim rai kyrkieh ban ai No Objection Certificate (NOC) ia ka surok Two-lane na Nongstoin sha Wahkaji bad u la ong ba kane ka long pyrshah ia ka mon jong ki paidbah.
Katkum ka jingong u Bah Kisborly Kharbani, uba dei u nongkitkam ka BJP Mawsynram Mandal bad ha ka juh ka por uba dei u Vice-President ka BJP East Khasi Hills District u la ong ha ka jingshisha u Bah Pynshngain ryngkat bad ka EC ki la dei ban iasyllok shwa bad ki paidbah, ym dei ban leh kyrkieh namar la iohi ba wat ka sorkar jylla ka dang leh suki ia kane ka kam, hynrei ym tip baleit ka KHADC kaba pynneh pynsah ia ka khyndew ka shyiap ka leh kyrkieh haduh katne.