‘Pynshngaiñ Nongdie Ri’ pyrta ki dkhot ka KSU, kyntait ia ka jingpynpait ït

Shillong, 28 Naitung:
Da ki phew ngut ki dkhot jong ka KSU ki la ia lum khrui ha phyllaw ka District Council mynta ka sngi bad ki la pyrta pynrem ia u CEM ka KHADC u bah Pyn-shngaiñ N Syiem da kaba ong “Bah Pynshngaiñ U Nongdie ri’ , ki la wah ruh ha khyrdop ka KHADC, da ki jingthoh pynrem kiba pher bapher ia u CEM bad ka District Council bad ki la wah ruh ia ka dur kaba pyni ia ki briew kiba la ioh ia ki jingpang khyllah na ka daw ka jingtih Uranium ha ki jaka bapher bapher.
Haba ia kren bad u Chairman jong ka Employment Cell ka KSU u bah Lambok Marngar u la ong ba ka KSU ka ieng pyrshah ia baroh ki projek surok ha ka thaiñ South West Khasi Hills, namar ba baroh kitei ki surok ki dei ki lynti ban poi sha ka jingtih Uranium. U la pynpaw ka jinglyngngoh ba baroh shi katta ka District Council ka ieng skhem ban ym ai NOC Uranium hynrei kyndit kyndit mynta ka la ai NOC ia ki 7 tylli ki surok, u la ong ruh ba katei ka jingleh ka District ka long kumba ka la lilam bad ka nongbynda ia ka ri bad ka jaitbynriew.
U bah Lambok u la ong ruh ba lada jia eiei ka ban poi sha u pud ban tih Uranium ka kynhun u bah Pynshngaiñ kaba don hapoh ka PDF ka dei ban shim ia ka jingkitkhlieh. U bah Lambok u la ong ba ka KSU ka dang khmih lynti ba ka District council kan dei ka nongiada ia ka ri bad ka jaitbynriew hynrei mynta pat u nongialam jong ka u bah Pynshngaiñ u long kum u lymbit uba kylla tdong tdong khlieh khlieh, “U bah Pynshngaiñ u la kylla lymbit , u kylla tdong tdong khlieh khlieh , um don ia ka rai ba rangbah, tang 24 kynta hadien ba la wa phai Delhi u la ai NOC” ong u bah Lambok.
Utei u nongialam ka KSU u la ong ruh ba ka KSU kan wad ia u bah Pynshngaiñ haduh ban da lap ban ia kren ia katei ka ishu, “Lada um wan hangne ruh , ngin wad ha ban da lap bad sha ka jaka ba u don wat shaduh konstitwensi jong u ruh” ong biang u bah Lambok. Ka KSU ka la ong ruh ba katei ka jingai NOC u bah Pynshngaiñ ka long pyrshah ia ka mon u paidbah bad ka la kyntu ia baroh ki MDC ba ki dei ban pyrshah ia katei ka rai u bah Pynshngain. “Ki MDC ki dei ban pyrshah ia katei ka rai u bah Pynshngaiñ, lada jia ba ki bakla ban shim ia ka rai, ki dei ban shim ia ka jingkitkhlieh” ong u bah Lambok.
Haba dawa ba ka KHADC ka dei ban pynduh pyndam noh ia katei ka NOC , ka KSU ka la kyntait ruh ia ka jingkynnoh ba ki dkhot ka KSU ki la pynpait it bad ktah kti ia ki nongtrei, “Ngim tip mano ba leh ioh dei pynban ki riew shim kabu, hynrei ngi wan hangne da kaba jai jai ym ban ktah kti iano iano” pynkut u bah Lambok Marngar.