Kyntait iatai nia ia U bah Ardent bad bah Shylla

Shillong,28 Naitung:
Ka Synjuk Ki Rangbah Shnong ka thaiñ Laitkor, Smit ka la kyntait ban pdiang ia ka jingtyrwa iatai hapdeng u bah Ardent M Basaiawmoit bad ka H.S Shylla. Haba ia kren bad u bah Stenis Pyngrope –President jong ka Synjuk u la ong ba ka Synjuk ka la kyntait ban pdiang ia katei ka jingiatai namar ba kim kwah ban pyniakhleh jaktung ia ka kam politik bad ki sordar ne ki Rangbah Shnong. U bah Stenis u la ong ruh ba ki Rangbah Shnong ,ki sordar ki kwah ba ka dong ka thaiñ kan shongsuk shongsaiñ.
Lah ban pynkynmaw ba ia katei ka jingiatai la kob da u bah H.S Shylla bad ka HSPDP ka la pdiang , hadien ba ka la pdiang u bah Shylla u la thoh sha ka Synjuk ki Rangbah Shnong ba kan shimti ia ka kam ban pyniaid ia katei ka jingiatai bad ka la aiti ruh ha ka Synjuk ba kan pynbeit ia ka bor, ka jaka bad ban pyniaid katkum ka jingstad jong ki halor ki mat iatai kiba u bah Shylla u la tyrwa.