Khang tih bad kit dewiong ha East Jaintia

Shillong, 27 Naitung:
U Deputy Commissioner, ka East Jaintia Hills District, Khliehriat ha ka kyrwoh khubor mynta ka sngi, ula pyntip, ba katba kum ka hukum jong ka kyndon 144 CrPC, kaba 16tarik Jymmang, 2016 bad katba kum ka hukum jong ka National Green Tribunal, kaba 17tarik Iaiong 2016, la khang ban tih dewiong ha baroh ki bynta jong katei ka District lane ban kit shabar jong ka District ruh kumjuh lane ban kit dewiong na ki krem sha ki jaka pynlang dewiong bad ban buh dewiong ha ka surok bah National Highway-44 bad kiwei de ki surok PWD, la khang pyrshah. La khang ruh ia ki briew, kiba ia lum lang bad kiba rah ia kino kino ki tiar, kiba lah ban pynmih ia ka jingmynsaw para briew bad kiba leh pyrshah, kin hap ha ki kyndon jong ka ain.